Barcelona po hyn në fazën vendimtare të negociatave për transferimin e sulmuesit të Atletico Madridit, Julian Alvarez, ndërsa drejtuesit katalanas pritet të marrin një vendim përfundimtar brenda ditëve të ardhshme.
Sipas AS, presidenti Joan Laporta nuk ka ndërmend ta mbajë ofertën të hapur pafundësisht. Fundi i korrikut dhe fillimi i gushtit janë konsideruar si afati përfundimtar për të kuptuar nëse operacioni mund të realizohet ose nëse klubi do të orientohet drejt një objektivi tjetër.
Pengesa kryesore mbetet qëndrimi i Atletico Madridit. Klubi madrilen vazhdon të këmbëngulë se Julian Alvarez nuk është në shitje, duke bërë të ditur se nuk do ta ndryshonte vendimin as për oferta që shkojnë deri në 200 milionë euro.
Pavarësisht kësaj, Barcelona e konsideron kampionin e botës me Argjentinën si përforcimin ideal për repartin ofensiv. Trajneri Hansi Flick vlerëson aftësinë e Alvarezit për të ushtruar presion ndaj kundërshtarëve, lëvizshmërinë dhe fleksibilitetin taktik, cilësi që i përshtaten filozofisë së tij të lojës.
Tekniku gjerman kërkon që situata të zgjidhet sa më shpejt, në mënyrë që skuadra të nisë sezonin e ri me një plan të qartë për sulmin.
Nëse negociatat me Atletico Madridin nuk sjellin rezultat, Barcelona ka përgatitur edhe alternativa të tjera për të përforcuar repartin ofensiv.
Ditët në vijim pritet të jenë vendimtare për të ardhmen e Julian Alvarezit dhe për strategjinë e Barcelonës në merkaton e verës.
