UEFA ka miratuar një format të ri për kualifikimet e Euro 2028, duke i dhënë fund praktikës së deritanishme që u garantonte vendeve organizatore një biletë automatike për në fazën finale. Për herë të parë, edhe katër vendet pritëse Anglia, Skocia, Uellsi dhe Republika e Irlandës do të duhet të kalojnë përmes eliminatoreve.
Sipas formatit të ri, të 55 kombëtaret evropiane do të ndahen në 12 grupe. Fituesit e grupeve dhe tetë ekipet më të mira të vendit të dytë do të sigurojnë direkt kualifikimin, duke plotësuar 20 nga 24 vendet e turneut final.
Megjithatë, UEFA ka parashikuar një mekanizëm sigurie për organizatorët. Dy nga katër vendet e mbetura në fazën finale do të rezervohen për vendet pritëse që nuk arrijnë të kualifikohen përmes eliminatoreve. Nëse më shumë se dy organizatorë dështojnë, këto vende do t'u jepen dy skuadrave organizatore me renditjen më të mirë në kualifikuese.
Vendimi ka nxitur diskutime, pasi bie në kontrast me politikën e FIFA-s për Kupën e Botës 2030, ku vendet organizatore kanë vende të garantuara në turne. Sipas raportimeve të The Sun, kjo ka sjellë reagime të shumta nga tifozët, të cilët kanë krahasuar qasjen e UEFA-s me atë të FIFA-s.
Euro 2028 do të zhvillohet në stadiume të njohura në Angli, Skoci, Uells dhe Republikën e Irlandës, përfshirë Wembley, Tottenham Hotspur Stadium, Etihad Stadium, stadiumin e ri të Evertonit, St James' Park dhe Villa Park.
