Mario Mitaj është gjithnjë e më pranë një transferimi te Genoa, me mbrojtësin e Kombëtares shqiptare që pritet të largohet nga Al-Ittihad gjatë kësaj merkatoje.
Sipas raportimeve nga Arabia Saudite, klubi italian po shtyn për të mbyllur marrëveshjen, ndërsa një tjetër zhvillim duket se i ka dhënë hov negociatave. Gazeta Asharq Al-Awsat raporton se Al-Ittihad ka siguruar shërbimet e mbrojtësit të majtë Fares Abdi, i cili pritet të marrë vendin e Mitajt në skuadër.
27-vjeçari u zgjodh nga drejtuesit e Al-Ittihad mes disa alternativave për të përforcuar krahun e majtë të mbrojtjes, një lëvizje që shihet si sinjal i qartë se klubi po përgatitet për largimin e futbollistit shqiptar.
Mitaj prej javësh lidhet me një transferim te Genoa, e cila e konsideron atë një përforcim të rëndësishëm për sezonin e ri. Afrimi i zëvendësuesit nga Al-Ittihad pritet të lehtësojë finalizimin e marrëveshjes mes palëve.
Fares Abdi, i lindur në Kaliforni, e nisi karrierën në Shtetet e Bashkuara përpara se të transferohej në Arabinë Saudite, ku ka luajtur për Al-Wehda, Al-Qadsiah, Al-Fayha dhe së fundmi për Neom. Në sezonin e kaluar ai zhvilloi 34 ndeshje dhe regjistroi tre asistime.
Me Al-Ittihad që ka gjetur tashmë pasuesin në krahun e majtë të mbrojtjes, transferimi i Mario Mitajt te Genoa duket më pranë se kurrë dhe mund të zyrtarizohet në ditët në vijim.
