Ndërkohë që fushata po i afrohet 11 majit, kryetarët e dy partive kryesore, PS dhe PD, përveç premtimeve të pafunda, nuk kursejnë as fyerjet dhe fjalët denigruese ndaj njëri-tjetrit. Ditën e djeshme ishte kryeministri Edi Rama, i cili në takimin që zhvilloi me gra në Dibër, tha se “gjysma e burrave janë çyrykë, nëse votojnë sërish ‘kënetën’”.
Fjalën “çyryk” Rama e përdori edhe në takimin elektoral që pati sot në qytetin e Lezhës, kur tha se “në momentin që insiston që je me kënetën e ka thënë me fjalët e veta që është çyryk”.
Nuk mungoi as përgjigjja me të njëjtin nivel epitetesh e kreut të PD, Sali Berisha, i cili gjatë takimit në Kamëz tha se kryeministri nuk e kishte kaluar dot Qafën e Buallit pa e tredhur dibranët. Për tu bërë më bindës në këtë krahasim, kreu demokrat shtoi se “dibranët janë të mençur dhe e dinin se i tredhuri nuk tredhet më”.
“Shkoi në Peshkopi dhe me gjuhën e një kopuku u tha grave se gjysma juaj i ka burrat çyrykë. I them Ramës se në ligj e në Kanun, Qafën e Buallit s’e kishe kaluar kurrë pa të tredhur dibranët. Por ata, nuk ka burra më të mençur, e dinin se i tredhuri nuk tredhet më. Kaq mund t’i themi,” – u shpreh Berisha.
Ndërsa qytetarët presin alternativa, debat idesh dhe përballje platformash qeverisjeje, kryeministri ia ka dalë të fusë në spiralen e tij të diskursit politik edhe kryetarin e opozitës. Pas shkëmbimit epiteteve mes tyre që zënë në fakt dhe vendin kryesor në lajmet e përditshme dhe në rrjetet sociale qëndron paaftësia e Edi Ramës për të bërë një analizë me vërtetësi të qeverisjes së tij 12-vjeçare… dhe diletantizmi i opozitës, që bëhet zëri i dytë në duetin e kotësive pa asnjë interes për shqiptarët.
