Lajmi për bllokimin e 4 ngarkesave me mandarina nga Shqipëria drejt Kosovës u pasqyrua gjerësisht nga media, e cila ngriti dyshimet se sasi të mëdha mandarinash kanë probleme me pesticidet. Ministria e Bujqësisë heshti zyrtarisht për këtë skandal dhe, natyrshëm, lajmi i publikuar solli reagimin e menjëhershëm që u pasqyrua me bllokimin e eksportit drejt Kosovës. VNA mëson se, në fakt, eksporti i mandarinave vijon normalisht në vende të tjera dhe mbetet e dyshimtë pse Kosova bllokon eksportin e mandarinave nga Shqipëria.
Ndoshta ka sasi të kufizuara që kanë probleme me pesticidet, por a është e drejtë që fermerët shqiptarë të penalizohen në eksportin e mandarinave? Pse heshtin institucionet shqiptare për përgjegjësinë që kanë në këtë proces? Kush janë individët e lidhur me Ministrinë e Bujqësisë që kanë interesa të drejtpërdrejta në kultivimin e mandarinave? Deri sa të gjenden përgjigjet e këtyre pyetjeve, kaosi i informacioneve do të vazhdojë të shpërndahet dhe paqartësitë e publikut do të vijojnë të rëndojnë mbi fermerin shqiptar, i cili, edhe në kushtet aktuale, e ka mjaft të vështirë të mbijetojë në një treg ku përparësia i jepet grosistëve të mëdhenj dhe eksportit të çdo produkti ushqimor nga jashtë.
