Anëtari i partisë “Djathtas 1912”, Enkelejd Alibeaj, deklaroi mbështetjen e partisë për zgjatjen e mandateve të prokurorëve të SPAK. Përmes një postimi në facebook, Alibeaj theksoi se partia do të votojë pro çdo nisme ligjore që fuqizon këtë institucion, duke e cilësuar atë si shpresë për luftën kundër korrupsionit në vend.
“Sot, 70% e opinionit publik mbështet SPAK-un. Ky institucion mbetet i vetmi që mund dhe lufton korrupsionin, ndaj e mbështesim pa kushte,” shkroi Alibeaj, duke theksuar rëndësinë e standardeve të reja në drejtësi për të siguruar barazinë para ligjit.
Postimi i plotë i Alibeajt:
"Djathtas 1912", partia e parë që deklaron votën pro për zgjatjen e mandateve të prokurorëve të SPAK
"Djathtas 1912", deklaron mbështetjen, edhe me votën tonë pro në Kuvendin e Shqipërisë, çdo nisëm ligjore që synon zgjatjen e mandateve të prokurorëve të SPAK.
“Djathtas 1912”, e mbështet fuqimisht të gjithë veprimtarinë e SPAK-ut, në këto 5 vite ekzistencë të këtij institucioni, pavarësisht kërkesës së opinionit për veprime ligjore më të vendosura. Për ne, SPAK mbetet i vetmi institucion që mundet dhe lufton korrupsionin në këtë vend.
Sot që flasim, 70% e opinionit publik e inkurajon dhe e mbështet SPAK-un.
Edhe pse në 33 vite, Shqipëria ka dështuar në barazinë para ligjit, institucionet e drejtësisë, SPAK dhe GJKKO, janë shpresëdhënëse, ndaj dhe ne i mbështesim ato në mënyrë të pakushtëzuar për sa kohë do të sjellin një standart të ri në vënien e drejtësisë në vend!
