Ish-kryeministri Sali Berisha ka akuzuar qeverinë për manipulimin e projektligjit për faljen e gjobave, duke pretenduar se përfituesit kryesorë nuk janë qytetarët e zakonshëm, por biznesmenë të lidhur me qeverinë dhe politikanë të fuqishëm.
Në një deklaratë për gazetarët, Berisha tha se ky projektligj është një formë tjetër amnistie për persona të privilegjuar. Ai përmendi emra konkretë, duke akuzuar kryeministrin Edi Rama dhe deputetë të Partisë Socialiste për favorizimin e disa bizneseve të mëdha.
“Ky nuk është ligj për fshatarët, por për Gjikurinë, të cilit i janë falur 2.1 miliardë lekë; për Qefalinë me 700 milionë lekë dhe dhëndrin e tij me 300 milionë lekë. Këta jo vetëm që janë gjobitur për ndërtimet pa leje, por tani u falet gjoba dhe u legalizohen objektet e ndërtuara,” tha Berisha.
Sipas tij, skema përfshin faljen e gjobave ndaj bizneseve të mëdha në zona rurale, përfshirë resorte dhe komplekse agroturistike, në një vlerë që kap shifrën e mbi 70 milionë eurove. Berisha e konsideroi këtë si një dhuratë fundviti për rrethin e ngushtë të pushtetit.
Në deklaratën e tij, Berisha e krahasoi këtë projektligj me amnistinë e mëparshme për të burgosurit, duke akuzuar ministrin e Drejtësisë, Ulsi Manja, për shkelje të ligjit në favor të personave të dënuar për çështje të rënda kriminale.
“Falja e gjobave nuk është asgjë tjetër veçse një tjetër skandal ku deputetët dhe Edi Rama janë paguar mirë për të përfituar një grup i vogël njerëzish. Kjo është një tradhti e hapur ndaj interesave të qytetarëve,” përfundoi Berisha.
