Kryeministri Rama, ka bërë thirrje për një qasje të re nga Kosova në marrëdhëniet me Serbinë. Gjatë një fjalimi në Parlamentin e Kosovës, Rama ka sugjeruar që Kosova të ngrijë dialogun bilateral me Serbinë dhe të përqendrohet në bashkëpunimin me Bashkimin Europian (BE) për normalizimin e marrëdhënieve.
Rama theksoi se Kosova duhet të këputë lidhjen e reciprocitetit nacionalist me Serbinë dhe ta zëvendësojë atë me një qasje të bazuar te BE-ja, duke përmbushur unilateralisht kushtet për normalizimin e marrëdhënieve. Sipas tij, ky veprim nuk bëhet për hir të Serbisë, por për të përmbushur detyrimet ndaj martirëve, brezave të rinj dhe objektivave kombëtare për integrimin në familjen europiane dhe euroatlantike.
“Kosova mund t’ia japë BE-së dhe NATO-s provën e përkatësisë së saj duke përmbushur të gjitha kushtet e normalizimit, jo për hir të Serbisë, por për hir të bashkimit tonë kombëtar në familjen europiane,” tha Rama.
Gjithashtu, kryeministri shqiptar nënvizoi se barra e përgjegjësisë për dështimin e dialogut duhet t’i atribuohet plotësisht Serbisë dhe jo Kosovës. Ai shtoi se duhet ruajtur një qasje paqësore për të bindur vendet skeptike të BE-së që ende hezitojnë të njohin pavarësinë e Kosovës.
“Duhet të jemi dorë për dorë, paqedashës dhe paqeruajtës për të bindur skeptikët në BE për absurditetin e rezervave të tyre ndaj njohjes së Kosovës si shtet sovran,” përfundoi Rama.
