Në një seancë të përbashkët mes Kuvendit të Kosovës dhe atij të Shqipërisë, që nisi me fjalën e Kryetarit të Kuvendit të Kosovës, Glauk Konjufca, dhe me ekzekutimin e himnit kombëtar shqiptar, u theksua rëndësia e unitetit mes dy shteteve shqiptare.
Gjatë fjalimit të tij, Konjufca dënoi ashpër agresionet serbe ndaj Kosovës, duke i cilësuar si përpjekje për destabilizim. Ai e veçoi sulmin e fundit në Ibër Lepenc, duke e quajtur atë një akt terrorist dhe duke kujtuar ngjarjet e një viti më parë në Banjskë, të organizuara nga Milan Radoiçiç me mbështetjen e presidentit serb Aleksandar Vuçiç.
“Rajoni dhe Kosova i kemi ndier ndikimet e tërthorta e drejtpërdrejta të agresionit rus në Ukrainë. Po mbyllim këtë vit me agresione nga Serbia që synojnë destabilizimin. Bashkimi ynë sot përbën më shumë se simbolikën e bashkëpunimit institucional; duhet të shihet si dëshmi që Kosova dhe Shqipëria janë me njëra-tjetrën në çdo rrethanë,” theksoi Konjufca.
