Përfaqësues të opozitës, anëtarë të Këshillit Bashkiak të Partisë Demokratike dhe Partisë së Lirisë kanë vijuar edhe ditën e sotme protestën para bashkisë Tiranë, duke kërkuar dorëheqjen e Erion Veliajt. Në një kohë që qytetarët ishin mbledhur në protestë, Policia nuk mori masa për të bllokuar qarkullimin e mjeteve. Gjendur përballë kësaj situate, qytetarët kanë bllokuar automjetet duke mos lejuar që ata të lëvizin në këtë aks. Belind Këlliçi paralajmëroi efektivët e policisë se do të mbajnë përgjegjësi ligjore për mosbllokimin e akseve për protestën. "Drejtuesit e rinj të policisë treguan që kamikazët e rinj që janë vendosur sot dhanë një shenjë besnikërie ndaj Ramës. Këta banditë sot që kanë marrë njoftimin zyrtar se do të protestojmë në orën 11:00 para bashkisë vendosën të përplasin qytetarët me protestuesit. Ta harrojnë se PD do të tërhiqet dhe do të biem në provokim. Vendosëm të vazhdojmë me protestën, donin të fusnin njerëzit në përplasje. Rama përdorues droge, nipi i Enver Hoxhës, perëndia të zbresë këtu PD nuk do të tërhiqet, opozita nuk tërhiqet”. Anëtari i Këshillit Bashkiak të PD-së, Dorjan Teliti, ka ngritur pikëpyetje se nga kush i morën urdhrat për të futur në konflikt protestuesit me qytetarët. Protestat para bashkisë kanë nisur pas shpërthimit të skandalit të dosjes "5D" ku drejtorët u akuzuan dhe arrestuan për abuzim me tenderët. Veliaj është nën hetim pasuror, BKH ushtroi kontroll në banesën e kryebashkiakut dhe bashkëshortes së tij Ajola Xoxa, po ashtu dhe në shtëpinë e vëllait të Erion Veliajt, Arbër Veliaj.
