- PD-PL paralajmërojnë përshkallëzim të protestës deri në mosbindje civile
Ditën e hënë më 23 Dhjetor, opozita i rikthehet sërish protestave në Tiranë. Protesta nis në orën 17:00 dhe mësohet se plani organizativ i saj përfshin bllokimin e disa akseve rrugore në kryeqytet. Kështu, sipas burimeve mediatike mësohet se segmentet që do të bllokohen janë rruga pranë Bashkisë së Tiranës, rreth-rrotullimi tek “Zogu i Zi”, tek sheshi “Wilson”, tek “Pallati me Shigjeta”, si dhe kryqëzimi tek “Rruga e Elbasanit”, pranë xhamisë së “Namazgjasë. Nëse më herët protestat kishin si moto lirimin e dy krerëve të opozitës, njërit nga arresti shtëpiak dhe tjetrit nga arresti me burg, kësaj rradhe kreu i PD, Sali Berisha tashmë në liri ka paralajmëruar protestë deri në mosbindje civile. Deklarata të tilla kanë ardhur edhe nga përfaqësuesit e opozitës të cilët kanë deklaruar se mund të ketë përshkallëzim të protestës. Sikurse mësohet protesta kësaj rradhe do ketë fokus korrupsionin qeveritar dhe sidomos atë në Bashkinë e Tiranës, kryesisht figurën e Erion Veliajt. Por përkundrejt planit të opozitës, edhe Policia mësohet se ka një plan, me fokus moslejimin e bllokimit të rrugëve. Policia do të përdorë forcat e Rendit dhe ato të reparteve Speciale të Shqiponjave dhe forcat e sigurië kombëtate si dhe autobotet me ujë për të shpërndarë protestuesit në rast Bllokimi. Opozita ka kërkuar tre orë leje bllokuese, por përgjigjja e policisë ka qënë negative duke thënë se nuk do të lejojë bllokimin e rrugëve.
Për të ndihmuar qytetarët që qarkullojnë në akset rrugore që do bllokohen Policia e Shtetit ka ndërmarrë masa që në rast bllokimi, të devijojë qarkullimin e automjeteve në rrugë alternative.
Policia e Tiranës ka njoftuar Partinë Demokratike, se në bazë të ligjit “Për Tubimet”, organizimi i tubimeve në disa segmente rrugore në bashkinë Tiranë krijon probleme dhe premisa për cenime të rendit publik dhe sigurisë së shtetasve të tjerë, pengon qarkullimin e automjeteve të emergjencës, cenon të drejtat dhe liritë themelore për lëvizjen e lirë të shtetasve, si dhe pengon lëvizjen e lirë të automjeteve të transportit publik dhe privat.
