Kryetari i bashkisë së Tiranës, Erion Veliaj, i cili është nën hetim nga SPAK dhe pritet të ketë një fund pas hekurave, kjo shihet edhe në fjalimet e tij propagandistike në daljet publike që i ka rralluar shumë kohët e fundit. Veliaj sot nga Vaqari tha se ndërtimi dhe rindërtimin e shkollave është një mision për të lënë pas një trashëgimi të vyer për brezin e ri.
“Ne do t’i lemë Tiranës një ‘buqetë’ me 50 shkolla. Llafet, cic-micet, i merr era, sherret e ditës harrohen. 50 shkollat ngelen. Këto shkolla janë “paja” që ia lëmë një brezi të ri” - shtoi ai.
“Paja” në traditën e dasmave shqiptare, më e zakonshme është kur familja përcjell vajzën në dasmën e saj. E nëse qëndrojmë në këtë krahasim që bën kreu i bashkisë, “pajat” janë dhurata që bëhen me lekët e familjes për bijën. Ndërsa në rastin e Veliajt, shkollat që siç pretendon ai se do i lërë si paja, janë bërë me lekët dhe taksat e qytetarëve, që në të shumtën e rasteve janë bërë me kosto tepër të larta.
Por meqë për Veliajn këto investime me lekët e taksapaguesve qenkan dhurata që do na lërë, atëherë po i bëjmë një pyetje të thjesht: po aferat 5D apo inceneratori që nuk ekziston në Tiranë, janë “paja” për qytetarët? Nëse përgjigjen nuk na e thua ne, amanet t’ua thuash prokurorëve të SPAK.
