Kryetari i Partisë Demokratike, Sali Berisha, ka prezantuar sot në një konferencë për shtyp banerin e PD dhe Aleancës për Shqipërinë Madhështore për zgjedhjet e 11 majit. Gjatë fjalës së tij, ai e cilësoi renditjen e PD-së me numrin 1 në fletën e votimit si një shenjë të fatit dhe një burim entuziazmi për demokratët.
“Nuk ka dhuratë më të madhe se kjo. Në të gjitha librat, numri 1 përshkruhet si më i miri, si i pari. Dhe kur fati hyjnor e tokësor i ra PD-së të ketë këtë numër, entuziazmi i demokratëve dhe shqiptarëve ishte dhe është i madh. Ata që votojnë për PD, de facto janë njisha! Të jesh 1-sh është nder e privilegj,” deklaroi Berisha.
Gjatë konferencës, ai kishte vendosur mbi tavolinë edhe një statujë bufi, si përgjigje ndaj deklaratave të kryeministrit Edi Rama për të. Sipas tij, bufi është simbol i mençurisë dhe dijes që nga kohët e lashta.
“Ky është një simbol i mençurisë, i diturisë dhe i vendimit jo në shekuj, por në mijëvjeçarë. Vendosa ta sjell këtu për të treguar se çfarë varfërie dhe shkretie kulturore ka njeriu që më etiketon me këtë simbol,” tha Berisha
