Kryetari i Partisë Demokratike, Sali Berisha, ka kritikuar ashpër reformën e drejtësisë në Shqipëri, duke e quajtur atë një dështim të madh dhe një akt korrupsioni ndërkombëtar që ka lënë qytetarët shqiptarë pa një sistem ligjor të ndershëm. Ai theksoi se kjo reformë ka sjellë një drejtësi të politizuar që përbën një rrezik të madh për të tashmen dhe të ardhmen e kombit, duke e krahasuar me diktaturat e kaluara. Sipas Berishës, reforma e ndërmarrë nën drejtimin e Xhorxh Sorosit ka privuar shqiptarët nga e drejta për një proces ligjor të drejtë dhe të shpejtë.
“Shqipëria nuk mund të jetë kurrë një vend i shtetit ligjor dhe i besueshëm për qytetarët e saj dhe investitorët pa një drejtësi që funksionon mbi parimet ndërkombëtare të sistemit të drejtësisë”, tha Berisha. Ai shtoi se kjo reformë ka bërë që të presësh deri 15 vjet për një vendim, duke theksuar se kjo është e papranueshme, sidomos për një shtet në zemër të Evropës.
Në fund, Berisha premtoi se nëse PD do të vijë në pushtet, do të bëjë një audit të thellë të korrupsionit dhe do të kthejë qytetarëve të gjithë paratë që u janë vjedhur. “Do të bëjmë pastrimin e shtëpisë tonë dhe do të rendim pas çdo qindarke të vjedhur qytetarëve shqiptarë”, tha ai.
Berisha mbylli fjalën e tij duke cituar fjalët e presidentit amerikan, Donald Trump: “Më i keqi është gënjeshtari”, duke theksuar se korrupsioni dhe gënjeshtrat që kanë karakterizuar këtë reformë do të ndalen kur Partia Demokratike të rikthehet në pushtet.
