Kryetari i PD, Sali Berisha, ka reaguar ndaj deklaratës së ish-drejtoreshës së SHISH-it, Vlora Hyseni, ndaj gazetares Klodiana Lala, duke e cilësuar si një përpjekje për shantazh. Në një prononcim për mediat jashtë Kuvendit, Berisha tha se përdorimi i të dhënave të tilla ndaj gazetarëve përbën shantazh dhe ngriti shqetësimin se një praktikë e tillë mund të përdoret edhe ndaj prokurorëve dhe gjyqtarëve.
“Që ish-shefja e Shërbimit, që tani është një kriminele ordinere dhe jo vetëm ordinere, t’i përgjigjet gazetares në atë mënyrë pyetjes së saj, së pari dëshmon veten se është një hakmarrëse e verbër. Së dyti shpif për një gazetare që e sulmon padronin e saj. Ky në këtë rast është shantazh ndaj gazetarëve dhe ky është një problem i madh, pasi kjo do shantazhojë edhe vetë prokurorët dhe gjykatësit. Druaj shumë se ky është një proces në zhvillim”, tha Berisha.
Më tej, kreu i PD-së u ndal edhe te gazetarët Baton Haxhiu, Berat Buzhala dhe Albatros Rexha, të cilët, sipas tij, kanë pasur takime me Vlora Hysenin. Berisha pretendoi se këto takime përbëjnë shkelje të ligjit në Kosovë dhe u bëri thirrje shoqatave të gazetarëve që rastet t’i referojnë pranë institucioneve të drejtësisë në Prishtinë.
“Tre gazetarët, Baton Haxhia, Berat Buzhala dhe Albatros Rexha, të cilët në përputhje me ligjin e Kosovës, kanë takuar Vlora Hysenin, kanë shkelur ligjin dhe janë të dënueshëm. I ftoj shoqatat e gazetarëve të bëjnë gati dosjen, t’i çojnë secilin prej tyre, i kanë të sakta 5 vite burg. E patë se si dolën këta nga ekrani në ekran, njëri thoshte “kam mikeshë”, thoshte Berati paçka se një ditë më parë e kishte takuar vet. Batoni që ishte një nga rekomanduesit kryesor, shkruajti shkeimin se Vlora e kishte dashurinë në funkdion të shërbimit. E dëgjoni tani çfarë marëzirash. Edhe Albatrosi foli në këto ujëra”, tha Berisha.
Kryedemokrati u bëri thirrje shoqatave të gazetarëve t’ua çojnë dosjet në gjykatë në Prishtinë dhe t’i marrin në hetim.
