Avokati i Popullit, Endri Shabani dhe stafi i tij kanë vizituar ambientet e Komisariatit Nr. 1 në kryeqytet, ku po mbahen të shoqëruar 6 protestues pas incidenit të ndodhur në tubimin para Kuvendit. Shabani ka ndjekur nga afër situatën për të verifikuar respektimin e të drejtave të tyre ligjore.
Pas daljes nga komisariati, ai konfirmoi se institucioni që ai drejton ka nisur zyrtarisht një hetim për të gjithë zinxhirin vendimmarrës dhe sjelljen e forcave të rendit, duke e cilësuar reagimin e policisë si joproporcional.
I pyetur mbi gjendjen dhe situatën juridike të të shoqëruarve, Shabani u shpreh:
“Kam ardhur vetë, dhe jo stafi pas videove shqetësuese që pamë. Shkova brenda u interesova për të drejaat e tyre dhe në çfarë statusi janë. Mora një nga avokatët dhe shkuam bashke. Të ndaluarit ende nuk kanë një status. Janë ndaluar për shkak të incidentit që ka ndodhur atje. Kemi nisur një hetim për sjelljen e policisë. E drejta për të protestuar është e drejtë Kushtetuese. Policia u soll në mënyrë disporpocionale dhe jemi shumë të shqetësuar për pamjet. Në hetim i gjithë zinxhiri vendimmarrës”.
Ndërkohë, Shabani dëgjoi edhe shqetësimet e familjarëve të protestuesve të shoqëruar.
