Debatet e ashpra politike kanë përfshirë Komisionin e Ligjeve gjatë nisjes së shqyrtimit të hartës së re territoriale. Përfaqësuesit e opozitës kanë kërkuar ndërprerjen e punimeve dhe fokusimin e Parlamentit te situata e sigurisë kombëtare, pas lajmeve për arrestimin nga SPAK të drejtoreshës së SHISH, Vlora Hyseni, për lidhje me krimin e organizuar.
Ndonëse opozita e cilësoi ngjarjen si “rënie të shtetit” dhe depërtim të mafies në strukturat më të larta shtetërore, shumica socialiste e ka kaluar situatën si një procedurë normale institucionalizimi në një shtet demokratik.
Deputeti demokrat Oerd Bylykbashi kërkoi që skandali i djeshëm të ishte rend dite në çdo komision dhe në seancë plenare.
“Rend dite sot, në çdo komision, në seancë plenare, është skandali i djeshëm. Kjo reforma që i sillni shqiptarëve për t’ia nxirë jetën, ka për sfond skandalin ku kreu i SHISH arrestohet nga SPAK për lidhje me krimin e organizuar. Ky shtet është i krimjur nga koka te këmbët, ky Kuvend diskuton për seksin e engjëjve… Ajo është një lungë e sistemit që është i infektuar në të gjitha qelizat e veta, me një emër infeksioni: Edi Rama”, tha Bylykbashi.
Nga ana tjetër, përfaqësuesit e shumicës socialiste e cilësuan zhvillimin si pjesë të funksionimit normal të institucioneve. Ulsi Manja u shpreh shkurt se bëhet fjalë për “veprimtari normale të institucioneve në një shtet demokratik”.
Debati u ashpërsua edhe më tej me ndërhyrjen e deputetit Saimir Korreshi, i cili kërkoi mbledhjen e Këshillit të Sigurisë nga Presidenti Bajram Begaj.
“Mendova se kishte ardhur Bajromi për të mbledhur Këshillin e Sigurisë, se ka rënë shteti, kanë rënë siguresat të gjitha. Ne vazhdojmë sikur këtu s’ka ndodhur asgjë, do bëjmë kooperativa të tipit lart apo të mesëm… Ky Kuvend a ka ndonjëherë prioritete kur bie siguria kombëtare? Sot kush e ruan shtetin tonë? Bajromi dini gjë ku është?”, tha Korreshi.
Edhe Tedi Blushi e cilësoi situatën si rënie të arkitekturës së shtetit dhe të sigurisë kombëtare.
“Jemi në kushtet kur arkitektura e shtetit ka rënë, ku siguria kombëtare ka rënë, s’besoj se ka prioritet më të madh për një Komision Ligjesh sesa të mbajë një qëndrim lidhur me një çështje e cila cenon Kushtetutën dhe sigurinë kombëtare të një vendi anëtar të NATO-s. Sot Shqipëria është pa SHISH, se u faktua që ky shërbim kontrollohej nga krimi e mafia”, tha Blushi.
Pavarësisht kërkesave të opozitës për të ndalur diskutimin mbi reformën territoriale dhe për ta zhvendosur vëmendjen te siguria kombëtare, shumica vijoi me qëndrimin se institucionet po funksionojnë normalisht.
