Me një vonesë prej tetë orësh, siç i justifikua ai, për shkak të diferencës me orën lokale në Nju Jork, ku ndodhet për Asamblenë e Përgjithshme të OKB-së, Kryeministri Edi Rama ka reaguar zyrtarisht lidhur me masën e arrestit shtëpiak të caktuar nga SPAK-u për drejtoren e Shërbimit Informativ të Shtetit (SHISH), Vlora Hyseni.
Përmes këtij reagimi, kreu i qeverisë njoftoi edhe shkarkimin e saj nga detyra.
Rama e nisi deklaratën e tij duke kërkuar ndjesë për vonesën dhe duke theksuar se pret që drejtësia të bëjë punën e saj e pavarur.
“Jam informuar lidhur me masën e arrestit shtëpiak që SPAK-u ka nxjerrë për drejtoren e Shërbimit Informativ të Shtetit, e pres që çdo dyshim i organit të akuzës të hetohet dhe zbardhet deri në fund përmes procesit të pavarur gjyqësor.”
Më tej, Kryeministri nënvizoi punën e deritanishme të Hysenit dhe vlerësimet nga agjencitë partnere, por nërmori një qëndrim të prerë se barazia para ligjit mbetet parim i padiskutueshëm.
“Përtej respektit për punën dhe për personin e Vlora Hysenit... rruga pa kthim që kemi zgjedhur është rruga e pavarësisë së organeve të drejtësisë për të hetuar e gjykuar këdoqoftë, pavarësisht statusit social apo funksionit publik.”
Gjatë reagimit të tij, Rama nuk kursye kritikat ndaj debatit politik dhe mediatik, duke e cilësuar reagimin publik ndaj çështjeve të tilla si një "gjyq mesjetar" që zhvillohet përpara se fjalën ta thotë gjykata.
“...është e pashmangashme mesa duket, që çdo hetim apo masë e marrë nga drejtësia në adresë të personave publikë, të kthehet në një motivim për të grirë mish njeriu në mexhelisin politik e mediatik dhe për të thirrur ‘litarin’ si në sheshet e ekzekutimit mesjetar, kohë përpara sesa gjykata të thotë fjalën e saj.”
Pavarësisht kësaj, ai hodhi poshtë pretendimet e opozitës se veprimet e drejtësisë përbëjnë akt-akuzë kundër mazhorancës, duke argumentuar se pikërisht kjo qeveri i ka hapë rrugën pavarësisë së institucioneve të reja.
“E megjithatë, kurrësesi nuk mund të jetë e vërtetë që veprimet e pavarura të drejtësisë dhe afirmimi i vijueshëm i barazisë para ligjit, të jenë njëkohësisht akt-akuza kundër pikërisht një shumice qeverisëse e cila me kurajo e me vendosmëri, ia ka çelur rrugën drejtësisë së pavarur...”
Në përmbyllje të qëndrimit të tij, Rama rithekësoi parimin e përgjegjësisë individuale dhe konfirmoi masën administrative të marrë ndaj kreut të SHISH-it.
“Pafajësia ose fajësia e një bashkëpunëtori të vendosur nën akuzë është një çështje individuale përballë prokurorisë e gjykatës... Lirimi nga detyra i drejtores së shërbimit është i menjëhershëm, e sapo të kthehem në Tiranë dhe në konsultim me Presidentin e Republikës, do të zgjedhim drejtuesin e ri të Shërbimit Informativ të Shtetit.”
