Arresti në shtëpi dhe pezullimi nga detyra i drejtoreshës së Shërbimit Informativ të Shtetit, Vlora Hyseni, ka marrë jehonë edhe në mediat ndërkombëtare. Agjencia Reuters dhe ajo italiane ANSA kanë raportuar për vendimin e gjykatës shqiptare, duke e lidhur çështjen me hetimet e SPAK për dosjen e korrupsionit në AKSHI.
Reuters shkruan se një gjykatë shqiptare ka pezulluar shefen e shërbimit sekret dhe ka urdhëruar arrestin e saj në shtëpi, nën dyshimin se ka zbuluar informacione të klasifikuara në kuadër të një hetimi më të gjerë korrupsioni.
Agjencia thekson se Vlora Hyseni, me origjinë nga Kosova, drejton SHISH-in që prej vitit 2023, ndërsa më parë ka shërbyer si zëvendësdrejtoreshë e inteligjencës në Kosovë. Sipas Reuters, Prokuroria e Posaçme, SPAK, e lidh çështjen me hetimet për korrupsion në Agjencinë Kombëtare të Shoqërisë së Informacionit, AKSHI, institucioni që menaxhon shërbimet publike digjitale dhe infrastrukturën IT në Shqipëri.
Reuters citon edhe reagimin e kryeministrit Edi Rama, i cili ndodhet në Nju Jork për Asamblenë e Përgjithshme të OKB-së. Rama ka deklaruar se e ka liruar menjëherë Hysenin nga detyra dhe se do të konsultohet me presidentin për emërimin e pasardhësit. Ai ka theksuar se “askush nuk është mbi ligjin”.
Edhe agjencia italiane ANSA ka raportuar për rastin, duke shkruar se është lëshuar mandat arresti për drejtoreshën e shërbimeve sekrete shqiptare, Vlora Hyseni. Sipas ANSA-s, masa është dhënë nga GJKKO në kuadër të hetimeve ndaj sipërmarrësit Ergys Agasi, i lidhur me hetimet për korrupsion në tenderët e AKSHI-t.
ANSA raporton se urdhri nuk është ekzekutuar menjëherë, pasi Hyseni rezultonte jashtë vendit. Agjencia italiane shkruan se ajo dyshohet për zbulim të sekreteve shtetërore, ndërsa në kuadër të të njëjtit hetim është kontrolluar edhe banesa e ish-drejtorit të Policisë së Shtetit, Ilir Proda.
Rasti shënon një nga zhvillimet më të rënda në institucionet e sigurisë në Shqipëri, pasi për herë të parë drejtuesja në detyrë e shërbimit sekret përballet me masë sigurie dhe pezullim nga detyra për dyshime që lidhen me sekretin shtetëror dhe një dosje korrupsioni të nivelit të lartë.
