Për vite me radhë, Edi Rama e ka shitur qeverisjen e tij si histori modernizimi, digjitalizimi dhe promovimi të grave në poste kyçe. Por tri emra që dikur përfaqësonin pikërisht këtë fasadë të pushtetit, sot janë kthyer në simbole të krizës së besimit: Belinda Balluku, Vlora Hyseni dhe Linda Karçanaj.
Janë tri gra që nuk kanë pasur role periferike. Përkundrazi, kanë qenë në zemër të mekanizmave më të rëndësishëm të shtetit: infrastruktura, energjia, inteligjenca dhe digjitalizimi. Pikërisht aty ku qarkullojnë para publike, sekrete shtetërore, tenderë, akses në të dhëna dhe pushtet real.
Belinda Balluku, një nga figurat më të afërta të Edi Ramës dhe ish-numri dy i qeverisë, është vendosur prej kohësh në qendër të dyshimeve për çështje që lidhen me pasuri, tenderë dhe ndikim politik. Emri i saj është përmendur në hetime dhe denoncime që prekin Ministrinë e Infrastrukturës dhe Energjetikës, institucionin që ajo drejtoi për vite me radhë dhe që ka administruar disa nga kontratat më të mëdha publike në vend. Në rastin e vilës në Palasë, SPAK dyshon për pasuri të fshehur dhe lidhje me biznesmenë që kanë përfituar tenderë publikë.
Vlora Hyseni është rasti edhe më i pazakontë. Drejtoresha e Shërbimit Informativ të Shtetit, institucioni që duhet të ruajë sigurinë kombëtare, përfundoi nën masë sigurie “arrest në shtëpi”. Ajo dyshohet për lidhje me aferën e AKSHI-t dhe me rrjetin e dyshuar që, sipas hetimeve, vepronte brenda sistemit të teknologjisë shtetërore. Për një vend si Shqipëria, ku shërbimi sekret është një nga institucionet më të ndjeshme, vendosja e drejtueses së tij nën masë sigurie është goditje e rëndë institucionale.
Linda Karçanaj, ish-drejtuesja e AKSHI-t, është një tjetër emër kyç në këtë panoramë. Për vite me radhë, AKSHI u paraqit si krenaria e qeverisë Rama: portali i shërbimeve online, shteti digjital, Shqipëria pa sportele. Por pas kësaj vitrine, hetimet kanë ngritur dyshime për abuzime me tenderët, kontratat dhe sistemet teknologjike që menaxhojnë të dhënat më të ndjeshme të qytetarëve dhe institucioneve.
Ajo që i bashkon këto tri raste nuk është vetëm fakti që janë gra në poste të larta. I bashkon afërsia me pushtetin e Ramës dhe vendosja në pozicione ku kontrolloheshin sektorë strategjikë. Balluku te paratë e mëdha të infrastrukturës dhe energjisë. Karçanaj te sistemi digjital dhe tenderët teknologjikë. Hyseni te shërbimi sekret dhe siguria kombëtare.
Në planin ligjor, të gjitha mbeten të pafajshme deri në një vendim të formës së prerë. Por në planin politik, panorama është tronditëse: tri figura të rëndësishme të modelit Rama sot lidhen me hetime për korrupsion, abuzim pushteti ose afera që prekin vetë nervin e shtetit.
Nëse dikur u paraqitën si fytyra e modernizimit, sot janë kthyer në pyetjen më të vështirë për qeverinë: sa nga shteti digjital, shteti sekret dhe shteti i tenderëve ka qenë realisht shtet, dhe sa ka qenë thjesht pushtet i pakontrolluar?
