Detaje të reja janë bërë publike nga ngjarja e rëndë e ndodhur në Baldissero d’Alba, në provincën e Cuneos në Itali, ku një 36-vjeçar shqiptar, i identifikuar si Gjovalin Lasri, humbi jetën pasi u qëllua me armë zjarri gjatë një tentative të dyshuar për vjedhje në një banesë.
Media italiane Tg1 ka publikuar telefonatën që pronari i banesës, 35-vjeçari Roberto Mollo, bëri në numrin e emergjencës 112 menjëherë pas ngjarjes.
“Mirëmbrëma, jam Roberto Mollo. Kam pasur hajdutë në shtëpi, unë u mbrojta… njëri ka vdekur”, dëgjohet të thotë ai në fillim të telefonatës.
Ngjarja ndodhi në orët e para të mëngjesit të së dielës, 20 shtator. Sipas të dhënave të deritanishme të hetimit, Mollo, i cili punon si shofer kamioni, dyshohet se qëlloi disa herë me armë zjarri pasi konstatoi praninë e disa personave në pronën ku jetonte, e cila ndodhej në rikonstruksion.
Sipas raportimeve të mediave italiane, në vendngjarje janë evidentuar 13 të shtëna, ndërsa një prej plumbave goditi 36-vjeçarin shqiptar, i cili humbi jetën.
Në telefonatën me shërbimet e emergjencës, Mollo shfaqet i tronditur dhe pretendon se kishte vepruar nga frika.
“Kam pasur frikë, jam i dëshpëruar. Po më silleshin nëpër shtëpi”, dëgjohet të thotë 35-vjeçari.
Komunikimi më pas kalon te karabinierët. Mollo i informon se ishte i armatosur dhe se kishte hapur zjarr.
“Unë jam i armatosur, u mbrojta. Tani është një person në tokë, nuk e di nëse ka vdekur”, deklaroi ai. I pyetur nëse kishte qëlluar, 35-vjeçari u përgjigj: “Po, i qëllova”.
Ai pretendoi gjithashtu se personi ishte i maskuar dhe ndodhej në oborrin e banesës në momentin kur ai qëlloi.
Çfarë u gjet pranë viktimës
Sipas autoriteteve italiane, Gjovalin Lasri u gjet pranë daljes së oborrit. Raportohet se ai kishte një kapuç, doreza dhe një elektrik dore, ndërsa gjatë kontrollit iu gjet edhe një kaçavidë.
Mediat italiane raportojnë se 36-vjeçari kishte me vete edhe rreth 2 mijë euro, ndërsa hetuesit po verifikojnë origjinën e parave dhe nëse ato mund të lidhen me episode të tjera vjedhjesh.
Një nga pistat që po shqyrtohet është se personat e përfshirë mund të kenë qenë pjesë e një grupi që lëvizte në zona të ndryshme për të kryer disa vjedhje brenda së njëjtës natë. Kjo mbetet pjesë e hetimit dhe ende nuk është përcaktuar përfundimisht dinamika e plotë e ngjarjes.
Autoritetet italiane po punojnë gjithashtu për identifikimin e personave të tjerë që dyshohet se kanë qenë së bashku me 36-vjeçarin.
Hetimet vijojnë për të përcaktuar me saktësi rrethanat në të cilat Roberto Mollo hapi zjarr, pozicionin e personave në momentin e të shtënave dhe nëse reagimi i tij plotëson kushtet ligjore të vetëmbrojtjes.
