Tashmë nuk është më e fshehtë se mes ministrit të ri të Brendshëm, Ervin Demo, dhe drejtorit të Përgjithshëm të Policisë së Shtetit, Skënder Hitaj, kanë nisur përplasjet e para.
Sinjali i parë erdhi që në takimin mes tyre, kur, sipas burimeve të VNA, Hitajt iu desh të priste jo pak në paradhomën e ministrit të ri. Mund të dukej një episod pa rëndësi, nëse vetëm pak ditë më vonë ngjarja e Sarandës nuk do të nxirrte në sipërfaqe një marrëdhënie që duket se ka nisur keq. Demo kërkoi ndërhyrje në zinxhirin drejtues të policisë lokale, duke e bërë të qartë se me drejtorin e Policisë nuk ndan domosdoshmërisht të njëjtën mënyrë të administrimit të strukturës.
Por burime të VNA thonë se arsyeja e vërtetë e ftohjes mund të jetë shumë më e hershme dhe mban një emër: Ergys Agasi.
Agasi, i kërkuar nga SPAK, për muaj me radhë kishte lëvizur i lirë në aksin Elbasan–Durrës–Tiranë. Sipas dyshimeve që po hetohen, ai kishte pasur mbrojtje në nivele të larta të institucioneve të sigurisë. Emri i ish-drejtorit të Policisë Ilir Proda është futur tashmë në hetim, ndërsa zhvillimet e fundit në dosjen e drejtueses së SHISH-it, Vlora Hyseni, kanë ngritur dyshime edhe për mbrojtjen që Agasi mund të ketë pasur nga institucioni i inteligjencës. Hyseni është nën hetim dhe ndaj saj është vendosur masa “arrest në shtëpi”; këto mbeten akuza në proces dhe jo fakte të provuara me vendim përfundimtar.
Por Agasi vazhdoi të ishte i lirë edhe pasi drejtimin e Policisë së Shtetit e mori Skënder Hitaj.
Deri në momentin kur u arrestua.
Dhe pikërisht arrestimi i Ergys Agasit, sipas burimeve të VNA, shënon pikën kur marrëdhënia mes Hitajt dhe Kryeministrit Edi Rama ndryshoi.
Kjo ngre një pyetje që deri tani nuk ka marrë përgjigje: a kishte marrë Skënder Hitaj porosi që Ergys Agasi të mos prekej? Dhe, nëse po, a ishte arrestimi i tij momenti kur drejtori i Policisë humbi mbështetjen politike që kishte deri atëherë?
Në këtë sfond, largimi i Besfort Lamallarit nga Ministria e Brendshme dhe ardhja e Ervin Demos marrin një tjetër peshë. Sidomos tani që përplasjet e para mes Demos dhe Hitajt nuk po vonojnë të shfaqen.
Nuk ka deri tani prova publike që lidhin emërimin e Demos me Agasin dhe as prova se Hitaj kishte marrë një urdhër për të mos e arrestuar atë. Por kronologjia e zhvillimeve e bën të pashmangshme pyetjen nëse Skënder Hitaj po paguan sot pikërisht arrestimin e njeriut që për muaj të tërë kishte arritur t’i shpëtonte Policisë së Shtetit.
Saranda mund të jetë vetëm përplasja e parë e dukshme. Problemi i vërtetë për Hitajn mund të ketë nisur shumë më herët.
Në ditët dhe javët që vijnë do të kuptohet nëse drejtori i Policisë do ta kalojë këtë krizë apo nëse ndryshimi në Ministrinë e Brendshme ishte paralajmërimi i një ndryshimi tjetër.
Sepse sot pyetja nuk është më vetëm pse Ergys Agasi u arrestua. Pyetja është nëse arrestimi i tij do t’i kushtojë Skënder Hitajt postin.
