Vendimi i fundit i Senatit Akademik të Universitetit të Shkodrës “Luigj Gurakuqi” për të hequr dëshminë e penalitetit nga kriteret e kandidimit për Bordin e Administrimit ka nxitur reagime publike. Ish-deputetja e Partisë Socialiste, tashmë deputete e pavarur, Marjana Koçeku, ka denoncuar publikisht këtë lëvizje, duke ngritur supozime të rënda për kapjen e institucionit nga persona me precedentë penalë.
Koçeku vuri në dukje absurditetin e këtij standardi të dyfishtë që po aplikohet në administratën publike në krahasim me arsimin e lartë. “Për me u ba sportelist në bashki, të kërkojnë dëshminë e penalitetit. Kurse me u ulë në Bordin e Universitetit të Shkodrës… prej ditës së Hanë, me 21 shtator, ajo dëshmi penaliteti nuk duhet ma.”
Sipas saj, ndryshimi i rregullores së brendshme është bërë në mënyrë të menjëhershme dhe pa transparencë publike, duke hequr pikën që garantonte pastërtinë figurës së anëtarëve drejtues.
“Në mbledhjen e fundit të Senatit Akademik të Universitetit të Shkodrës vendosën me e heqë nga kriteret pikën ‘d’, e cila garantonte pastërtinë ligjore të kandidaturave për anëtarë të Bordit të këtij universiteti.”
“Sipas qëndrimit të rektores, dr. Blerta Dragusha, fakti që nji kandidat mund të ketë qenë i ndjekun penalisht, i dënuem apo i përfshimë në vepra penale, nuk përban ma aspak pengesë për kandidimin dhe zgjedhjen.”
Koçeku thekson se ky vendim cenon drejtpërdrejt integritetin e një prej institucioneve më të rëndësishme arsimore në vend dhe ngre hije të forta dyshimi mbi arsyet e këtij ndryshimi pas një dekade zbatimi.
“Nji rregull që ka ndejtë dhjetë vjet nuk hiqet rastësisht, nji të hane në mëngjes, pa media në sallë. Kjo asht nji çështje që prek drejtpërdrejt standardin moral dhe institucional të universitetit.”
Deputetja e pavarur ka kërkuar gjithashtu llogari nga Ministria e Arsimit për heshtjen e saj përballë shkeljes ose devijimit nga udhëzimet kuadër që përcaktojnë pastërtinë ligjore të kandidatëve.
“Shqetësuese asht edhe heshtja e Ministrisë së Arsimit. Sipas urdhnit të vitit 2025, vetë Ministria përcakton kritere që lidhen me gjendjen gjyqësore dhe integritetin ligjor të kandidatëve. Atëherë mbi çfarë baze hiqet ky kriter për Universitetin e Shkodrës dhe pse nuk ka asnji reagim institucional?”
Në përmbyllje të denoncimit të saj, Marjana Koçeku nënvizon se ky përjashtim i posaçëm nuk është i rastësishëm, por i përshtatur për emra specifikë.
“Nëse për Universitetin e Shkodrës, që mban e emnin e madh ‘Luigj Gurakuqi’, qenka ba ky përjashtim, atëherë pyetja nuk asht pse e hoqën. Pyetja asht: për kë e hoqën?”
