Kreu i Grupit Parlamentar të Partisë Demokratike, Gazment Bardhi, ka reaguar pas arrestimit të Ergys Agasit, duke i kërkuar SPAK që çështja të trajtohet si një hetim me interes kombëtar dhe të zbardhet, sipas tij, mënyra se si është ushtruar pushteti gjatë qeverisjes së Edi Ramës.
Përmes një reagimi në rrjetet sociale, Bardhi pretendon se Ergys Agasi dhe Belinda Balluku, ndonëse rivalë për pushtet pranë kryeministrit, kanë në dorë prova që mund të rrezikojnë jo vetëm pushtetin, por edhe lirinë e Edi Ramës.
Sipas Bardhit, gjatë 4-5 viteve të fundit Agasi ka luajtur rolin e një “zëvendëskryeministri të paemëruar”, duke vepruar në hije dhe duke pasur dijeni të gjerë mbi mënyrën e funksionimit të pushtetit.
Deputeti demokrat e cilëson arrestimin e Agasit, tetë muaj pas shpalljes së tij në kërkim, si të vonuar, por të mirëpritur. Megjithatë, ai argumenton se arrestimi i një personi nuk mjafton nëse nuk hetohet ajo që ai e konsideron si burimin politik të pushtetit të tij.
“Prandaj, një Ergys më shumë në burg nuk ndryshon asgjë, nëse burimi i pushtetit të tij për të vepruar si grup i strukturuar kriminal, për të përcaktuar vlerat e tenderave publikë, për të korruptuar zyrtarë, për të eliminuar konkurrencën me dhunë dhe për të pastruar paratë e krimit vazhdon të jetë në krye të qeverisë”, shkruan Bardhi.
Ai i kërkon SPAK që përmes hetimit të veprimtarisë së Agasit të zbardhë edhe shtrirjen e ndikimit që ky i fundit dyshohet se ka pasur në institucione, drejtësi dhe media.
“SPAK ka detyrimin që çështjen e Ergys Agasit ta trajtojë si një çështje me interes kombëtar dhe, përmes veprimtarisë së tij kriminale, të zbardhë mënyrën se si Edi Rama ka ushtruar pushtetin. Sa nga pasuria publike ka kontrolluar Ergys Agasi? Deri ku ka depërtuar pushteti i tij në shtet, drejtësi dhe media? Dhe a është Edi Rama në regjistrimet e sekuestruara nga SPAK?”, përfundon Bardhi.
