Avokati Maks Haxhia ka folur pas takimit me Ergys Agasin, i cili u arrestua mbrëmjen e djeshme në Durrës dhe më pas u transferua në bllokun e sigurisë, pas marrjes në pyetje nga agjentët e BKH-së.
Haxhia tha se takimi kishte si qëllim përgatitjen e mbrojtjes për procesin që pritet të zhvillohet në ditët në vijim lidhur me arrestimin dhe kushtet e tij. Avokati ngriti si shqetësim faktin se mbrojtja ende nuk disponon dosjen hetimore, pavarësisht se, sipas tij, e ka kërkuar prej kohësh.
“Ne duam dosjen, sepse është e turpshme që edhe pas kaq kohësh që e kemi kërkuar, kjo nuk ka ndodhur. Pa dosjen nuk ngremë dot pretendimet”, deklaroi Haxhia.
Sipas avokatit, Agasi pretendon se nuk ka përgjegjësi juridike në çështjen për të cilën po hetohet, me argumentin se nuk ka mbajtur funksione publike dhe nuk ka pasur kompetenca në administrimin e financave publike apo në procedurat e tenderimit.
Haxhia kritikoi gjithashtu mënyrën se si është trajtuar çështja publikisht, duke pretenduar se ajo është “fryrë” nga media.
“Këta të fusin në burg, pastaj të bëjnë hetimet. Si ajo historia që të marrin, të presin këmbën dhe pastaj të numërojnë nëse i ke apo jo të dyja këmbët”, u shpreh avokati.
Mbrojtja pritet të njihet me materialet e dosjes dhe të paraqesë pretendimet e saj gjatë procedurave gjyqësore që lidhen me arrestimin e Agasit.
