Një tragjedi e rëndë ka goditur një familje shqiptare në Jacksonville të Floridas, ku tre fëmijë, të gjithë djem, humbën jetën pasi një zjarr i fuqishëm përfshiu një banesë dykatëshe. Katër persona të tjerë, mes tyre dy fëmijë, janë dërguar në spital në gjendje kritike.
Të afërm të familjes, të cilët mbërritën në vendngjarje, konfirmuan për mediat lokale se familja është me origjinë nga Shqipëria.
Alarmi për zjarrin u dha rreth orës 05:15 të mëngjesit të së mërkurës, 26 gusht. Sipas shefit të Departamentit të Zjarrfikësve dhe Shpëtimit të Jacksonville (JFRD), Percy Golden, ekipet mbërritën brenda pak minutash dhe gjetën flakë të fuqishme në katin e parë, ndërsa kati i dytë ishte mbuluar nga tymi i dendur.
Skenat në vendngjarje kanë qenë dramatike. Një fqinj tregoi për News4JAX se persona që ndodheshin pranë shtëpisë ndërhynë për të ndihmuar në shpëtimin e një foshnjeje dhe një të rrituri, të cilët dolën nga një dritare e katit të dytë për t’u shpëtuar flakëve.
Në momentin kur mbërritën zjarrfikësit, dy të rritur dhe dy fëmijë kishin arritur të dilnin nga banesa. Ekipet e shpëtimit hynë menjëherë brenda për të kërkuar persona të tjerë, por gjatë kontrollit gjetën pa shenja jete tre djem. Autoritetet nuk kanë bërë ende publike moshat e viktimave.
Katër personat që shpëtuan, dy të rritur dhe dy fëmijë, u transportuan me urgjencë në një spital të zonës. Gjendja e tyre është raportuar kritike.
Zjarrfikësit arritën t’i vendosnin flakët nën kontroll rreth orës 05:40, por banesa u shkatërrua rëndë. Zjarri shkaktoi dëme edhe në dy njësi të tjera ngjitur.
Pas tragjedisë, Kryqi i Kuq Amerikan është angazhuar për të ndihmuar shtatë të rritur dhe gjashtë fëmijë të mbetur pa strehë.
“Nuk ka fjalë që mund të lehtësojnë peshën e një mëngjesi si ky”, deklaroi JFRD, duke shprehur ngushëllime për familjet që humbën njerëzit e tyre dhe mbështetje për të plagosurit.
Shkaku i zjarrit nuk është përcaktuar ende dhe autoritetet kanë nisur hetimet për të zbardhur se si nisi tragjedia që i mori jetën tre fëmijëve të familjes shqiptare.
