Kryetari i Partisë Demokratike, Sali Berisha, duke komentuar arrestimin e Ergys Agasit, tha se ishte një njeri me pushtet të gjerë brenda qeverisjes së Edi Ramës. Në konferencën për mediat, kreu i PD-së pretendoi se Agasi kishte ndikim në institucione të rëndësishme shtetërore dhe deri në emërimin e ministrave të Brendshëm.
“Ergys Agasi, koordinatori i Edi Ramës për të gjitha organizatat kriminale dhe kartelet e drogës. Njeriu që nëpërmjet AKSHI-t të Lindave, Lindës së Surrelit apo patronizhtës së AKSHI-t dhe Lindës drejtoreshë ai kontrolloi cdo të dhënë të shtetasve shqiptarë dhe të huaj në Shqipëri. Ergys Agasi ishte dhe është personi që sipas pohimeve verbale ndryshonte, emëronte ministrat e Brendshëm dhe kishte një kontroll fjollë mbi SHIK, tashmë të denoncuar nga unë prej vitesh në mënyrë të përsëritur. Miqësia e kryetares së SHIK, me Agasin është denoncuar në mënyrë të përsëritur nga kjo platformë”, tha kryedemokrati.
Por, përtej akuzave që kreu demokrat ngriti ndaj qeverisë, Berisha nuk duket se do të ndryshojnë kursin e PD në dy komisionet e përbashkëta për Reformën Zgjedhore dhe atë Territoriale.
Sipas Berishës, PD do vijojë të jetë në tryezë me mazhorancën në komisionet përkatëse, ndërsa njoftoi se hapat e mëtejshëm do të përcaktohen sot në mbledhjen e Këshillit Kombëtar të PD.
“Padiskutim që ne do t'i përgjigjemi bojkotit të njëanshëm që Edi Rama i bëri reformës territoriale. Qëndrimi ynë tjetër do përcaktohet sot për hapat që do ndërmarrim. Ne nuk tërhiqemi nga refuzimi kategorik i reformës së Edi Ramës. Po shfrytëzojmë çdo lloj hapësire që mund të gjejmë për ta kundërshtuar atë”, tha Berisha.
Kështu, ndërsa jashtë Parlamentit Berisha nuk i kursen akuzat ndaj Ramës me njerëz të lidhur me krimin, brenda institucioneve PD vijon të ulet përballë socialistëve për të negociuar dy prej reformave kryesore politike.
