Taulant Tushe, një prej zyrtarëve të lartë të Bashkisë së Tiranës, i cili ndodhet në arrest në lidhje me aferën e inceneratorit të Tiranës, i është drejtuar Gjykatës së Posaçme me një letër, e cila u lexua gjatë seancës nga avokati i tij, Ermal Yzeiraj.
“Më kanë burgosur pa gjyq. Në lidhje me procesin e mbetjeve, unë dhe Bashkia Tiranë jemi përpjekur të bëjmë më të mirën. Për këtë koncesion nuk pati asnjë ankesë në Agjencinë e Prokurimeve Publike. Ne, si Bashki, për aq sa na takoi, bëmë detyrën tonë,” theksonte Tushe, i cili konsiderohet si një nga njerëzit më të besuar të kryebashkiakut të Tiranës, Erion Veliaj.
Sipas tij, “me këtë standard të vendosur nga SPAK, edhe punonjës të tjerë të administratës mund të ndihen të rrezikuar dhe të frikësuar.” Përmes letrës, ai kërkonte të shpallej i pafajshëm.
Avokatët deklaruan në sallën e gjyqit se SPAK ka ngritur një fabul të pavërtetë, sipas së cilës zyrtarët e Bashkisë së Tiranës dhe Ministrisë së Mjedisit kishin rënë dakord paraprakisht dhe më herët për nisjen e procedurave të koncesionit.
Për aferën e inceneratorit të Tiranës janë nën akuzë shumë zyrtarë, përfshirë ish-ministrin e Mjedisit, Lefter Koka, dhe ish-deputetin socialist, Alqi Bllako. Mirel Mërtiri dhe Klodian Zoto, pronarët faktikë të inceneratorit, janë shpallur në kërkim për akuzat e korrupsionit dhe pastrimit të parave.
