Një ngjarje e rëndë është regjistruar pasditen e sotme në zonën e Shkëmbit të Kavajës, ku një 50-vjeçar ka humbur jetën pasi është mbytur në det.
Sipas informacioneve paraprake, burri ndodhej në ujë në momentin kur ka pësuar incidentin fatal. Menjëherë pas marrjes së njoftimit, në vendngjarje kanë mbërritur shërbimet e Policisë dhe ekipet e urgjencës mjekësore, të cilat kanë konstatuar vdekjen e tij.
Ky është rasti i dytë tragjik i mbytjes në këtë zonë brenda pak ditësh. Vetëm dy ditë më parë, një 11-vjeçar humbi jetën pasi u mbyt në det, një ngjarje që tronditi opinionin publik dhe riktheu shqetësimet për sigurinë në plazhe gjatë sezonit turistik.
