Avokati Kujtim Cakrani deklaroi në emisionin Now në Euronews Albania se rasti i dhunës së ushtruar ndaj policit Ardian Isufi në Vlorë përbën një goditje të rëndë ndaj vetë institucionit të Policisë së Shtetit.
Cakrani theksoi se polici ndodhet në gjendje shumë të rëndë shëndetësore dhe është në rrezik për jetën, ndërsa sipas tij, asnjë zyrtar i lartë i policisë nuk ka shkuar në spital për ta vizituar apo për të marrë informacion mbi ngjarjen.
“Polici është në reanimacion dhe deri tani nuk ka shkuar asnjë përfaqësues i policisë ta pyesë apo ta vizitojë. E kuptoni në çfarë shteti terrorist jetojmë? Pamjet kur i dhanë dorën njëri-tjetrit, kur iu kërkua falje babait për fëmijën – pse nuk dalin? Janë ulur, kanë pirë kafe për gjysmë ore. Po fshihet një krim i bërë ndaj një oficeri policie. Ai është dëmtuar rëndë dhe nuk dihet nëse do t’i mbijetojë plagëve. Është një punonjës me mbi 20 vite shërbim dhe është lënë në harresë. Pamjet që qarkullojnë në rrjet, ku thuhet se po goditet një fëmijë, janë një devijim nga e vërteta”, deklaroi Cakrani.
