Një ngjarje e rëndë është regjistruar mëngjesin e së dielës në fshatin Demiraj të Gjilanit, ku një 27-vjeçar dhe një foshnjë janë gjetur të pajetë brenda një banese.
Sipas informacioneve ende të pakonfirmuara zyrtarisht, një 65-vjeçar dyshohet se është përfshirë në vdekjen e dy familjarëve të tij. Raportimet e para ngrenë dyshime për vrasje të dyfishtë, por autoritetet nuk kanë konfirmuar arrestimin e tij apo përgjegjësinë për ngjarjen.
Policia e Kosovës ka bërë të ditur se njoftimi është marrë rreth orës 08:47 dhe se në vendngjarje kanë mbërritur policia, prokurori dhe ekipet mjekësore, të cilat konstatuan vdekjen e dy personave.
Trupat janë dërguar për autopsi, ndërsa hetimet vijojnë për përcaktimin e shkakut të vdekjes dhe rrethanave të tragjedisë.
