Detaje të reja kanë dalë në dritë lidhur me vrasjen e 49-vjeçares Arlinda Zekaj në Kosovë, ndërsa dyshimet për neglizhencë nga institucionet e drejtësisë po zgjerohen. Viktima, e cila dyshohet se u vra nga kunati i saj, kishte kërkuar ndihmë nga disa prej institucioneve më të larta të drejtësisë, vetëm pak ditë përpara krimit.
Sipas gazetës Nacionale, Arlinda Zekaj i kishte dërguar një letër edhe kryetarit të Këshillit Gjyqësor të Kosovës (KGJK), Rrustem Thaqi, përmes së cilës denonconte mungesën e reagimit institucional ndaj dhunës që pretendonte se po përjetonte.
Burime të Nacionales bëjnë të ditur se viktima kishte dërguar të njëjtën letër edhe te Kryeprokurori i Shtetit, Zejnullah Gashi, duke kërkuar ndërhyrjen e institucioneve për mbrojtjen e saj. Në shkresat e dërguara, 49-vjeçarja ngrinte shqetësimin për mënyrën se si autoritetet kishin trajtuar denoncimet e saj.
Gazeta Nacionale ka kërkuar sqarime nga Këshilli Gjyqësor i Kosovës nëse letra ishte pranuar nga drejtuesi i institucionit dhe nëse ishte ndërmarrë ndonjë veprim konkret. Megjithatë, deri në publikimin e raportimit, KGJK-ja nuk kishte kthyer përgjigje.
Ndërkohë, Policia e Kosovës ka arrestuar në Deçan Albert Sylajn, kunatin e viktimës, i cili dyshohet si autor i vrasjes. Sipas njoftimit policor, arrestimi është kryer rreth orës 23:40, pas veprimeve të ndërmarra nga njësitet përkatëse. Sylaj dyshohet se e ka goditur 49-vjeçaren me sëpatë në kokë, duke i shkaktuar vdekjen.
Përpara ngjarjes tragjike, Arlinda Zekaj kishte denoncuar dhunën që, sipas saj, ushtrohej nga bashkëshorti dhe pjesëtarë të tjerë të familjes. Ajo i ishte drejtuar gjithashtu kryeprokurores së Prokurorisë Themelore në Pejë, Lumturije Vuçetaj, duke kërkuar hetimin e institucioneve që pretendonte se kishin neglizhuar rastin e saj.
Në letrën drejtuar kryeprokurores, viktima kishte paralajmëruar për rrezikun që i kanosej jetës, duke shkruar:
“Uroj që të mos vijë dita kur ju dhe institucionet përgjegjëse të detyroheni të jepni llogari vetëm pasi të jetë marrë jeta ime”.
Vrasja e Arlinda Zekajt ka ngritur pikëpyetje serioze mbi reagimin e institucioneve të Kosovës ndaj denoncimeve për dhunë në familje. Raportimet për letrat e dërguara përpara krimit shtojnë nevojën për të sqaruar nëse autoritetet kishin dijeni për rrezikun dhe çfarë masash, nëse ka pasur të tilla, ishin ndërmarrë për mbrojtjen e viktimës.
