Vetëm një javë pas humbjes së pushtetit nga Aleksandar Vuçiç në zgjedhjet parlamentare, policia serbe ka arrestuar Marko Kriçak, kreun e Drejtorisë së Policisë Kriminale, një prej drejtuesve më të diskutuar të forcave të rendit gjatë protestave studentore kundër qeverisjes së mëparshme.
Arrestimi u krye mëngjesin e së dielës, 1 nëntor, me urdhër të Prokurorisë së Lartë të Beogradit. Bashkë me Kriçakun u arrestua edhe Boško Sekuloviç, drejtues i Shërbimit për Luftën Kundër Kriminalitetit. Për të dy është vendosur ndalimi policor për 48 orë.
Sipas kryeprokurorit Nenad Stefanoviç, Kriçak dyshohet për shpërdorim detyre dhe torturë, ndërsa Sekuloviç për shpërdorim detyre. Hetimet lidhen me rastin e njohur si “Senjak”, pas vrasjes së Aleksandar Neshoviçit në një restorant të Beogradit, në maj të këtij viti.
Prokuroria dyshon se drejtuesit e policisë kanë abuzuar me kompetencat dhe kanë penguar veprimet hetimore. Kriçak dyshohet gjithashtu se, së bashku me disa efektivë, ka keqtrajtuar dhe torturuar një person në ambientet e Policisë Kriminale.
Emri i tij ishte bërë i njohur për publikun serb gjatë protestave studentore të vitit 2025. Studentja Nikolina Sinxheliç e kishte akuzuar se në gusht të atij viti, pasi ishte ndaluar gjatë një proteste në Beograd, ishte dërguar në garazhin e godinës së qeverisë, ku Kriçak dyshohet se e kishte goditur duke ia përplasur kokën në mur dhe e kishte kërcënuar me përdhunim. Studentja kishte paraqitur kallëzim penal për ngjarjen.
Arrestimi vjen në një moment ndryshimesh të mëdha politike në Serbi. Në zgjedhjet parlamentare të 25 tetorit, lista e mbështetur nga lëvizja studentore siguroi shumicën parlamentare, duke i dhënë fund dominimit të Vuçiçit dhe partisë së tij.
Megjithatë, kryeprokurori Stefanoviç ka deklaruar se arrestimet nuk kanë lidhje me rezultatin zgjedhor, por me hetimet penale për rastin “Senjak”.
