Industria e jetëgjatësisë po rritet me shpejtësi, duke premtuar se vitamina, suplemente dhe formula të ndryshme mund të ngadalësojnë plakjen e organizmit. Por një studim i Universitetit Yale, i publikuar në revistën shkencore Nature Medicine, ka zbuluar se disa nga ndërhyrjet më të efektshme për përmirësimin e treguesve biologjikë të plakjes nuk gjenden domosdoshmërisht në një kuti suplementesh.
Shkencëtarët amerikanë analizuan të dhënat e 51 studimeve klinike që kishin testuar ndërhyrje të ndryshme për ngadalësimin e plakjes. Për të matur rezultatet, ata përdorën të ashtuquajturat orë epigjenetike, metoda që analizojnë ndryshimet kimike në ADN për të vlerësuar moshën biologjike të organizmit.
Ndryshe nga mosha kalendarike, që tregon sa vite kemi jetuar, mosha biologjike synon të tregojë gjendjen e organizmit dhe mënyrën se si ai po plaket.
Rezultatet treguan se kombinimi i një ushqyerjeje të shëndetshme me aktivitetin fizik ishte ndër ndërhyrjet që përmirësonin vazhdimisht treguesit e plakjes biologjike. Efekte u vunë re edhe nga disa trajtime mjekësore, përfshirë metforminën, semaglutidin dhe terapitë që kontrollojnë inflamacionin.
Por rezultati më befasues lidhej me suplementet që shiten pa recetë. Në analizën e studiuesve, produktet e testuara, përfshirë disa suplemente ushqimore, nuk treguan përgjithësisht një ndikim domethënës në uljen e moshës epigjenetike.
Kjo nuk do të thotë se të gjitha vitaminat janë të panevojshme. Ato mund të jenë të rëndësishme kur organizmi ka mungesa të caktuara. Por përdorimi i tyre si produkte kundër plakjes mbetet një pretendim që kërkon prova shumë më të forta.
Studiuesi Raghav Sehgal, autori kryesor i studimit, theksoi se analizat e reja biologjike po u japin shkencëtarëve mundësinë të matin ndryshimet që më parë ishin të vështira për t'u identifikuar.
Megjithatë, ekipi i Yale paralajmëron se përmirësimi i një treguesi biologjik nuk do të thotë automatikisht se një person do të jetojë më gjatë apo do të shmangë sëmundjet e moshës.
Studimi nuk provon as se medikamente si metformina apo semaglutidi duhet të përdoren nga njerëz të shëndetshëm për qëllime anti-aging.
Në një treg ku jetëgjatësia po shitet gjithnjë e më shumë në formën e pilulave, shkencëtarët rikthejnë vëmendjen te dy zakone të njohura prej kohësh: ushqyerja dhe lëvizja.
