Fëmijët që nga mosha 6 vjeç mund të përfitojnë nga barnat për trajtimin e obezitetit, sipas një studimi të ri ndërkombëtar, i cili sugjeron se këto medikamente mund të jenë efektive dhe relativisht të sigurta edhe në moshat e vogla.
Studiuesit analizuan rezultatet e nëntë studimeve klinike ku u përfshinë 756 fëmijë dhe adoleshentë nga 6 deri në 17 vjeç, të trajtuar me barna GLP-1 për obezitet dhe jo për diabet.
Rezultatet treguan se fëmijët humbën mesatarisht rreth 5 kilogramë. Ndërsa ata që morën semaglutide – substanca aktive e barnave Wegovy dhe Ozempic – humbën mesatarisht afro 18 kilogramë.
Shumica e studimeve kishin përdorur më parë liraglutide dhe exenatide, por këto medikamente tashmë janë zëvendësuar në masë të madhe nga semaglutide dhe tirzepatide, i njohur me emrin tregtar Mounjaro.
Aktualisht, asnjë prej këtyre barnave nuk është i miratuar për fëmijët nën 12 vjeç jashtë studimeve klinike. Në Mbretërinë e Bashkuar, Wegovy mund të përdoret privatisht vetëm për fëmijët mbi 12 vjeç dhe është tashmë i disponueshëm edhe në formë tablete.
Studimi u drejtua nga Universiteti i Western Ontario në Kanada dhe u prezantua në Kongresin Ndërkombëtar të Obezitetit në Mexico City. Ai përfshiu të dhëna nga studime të zhvilluara në vende të ndryshme, përfshirë SHBA-në dhe Gjermaninë.
Fëmijët u ndoqën për një periudhë deri në 68 javë. Përveç humbjes së peshës, studiuesit vunë re ulje të tensionit arterial, rënie të ritmit të zemrës dhe përmirësim të cilësisë së jetës.
Sipas drejtuesit të studimit, Dr. Manpreet Kaur Oberoi, barnat GLP-1 rezultuan “dukshëm efektive në uljen e indeksit të masës trupore, peshës, ritmit të zemrës dhe tensionit sistolik, duke ruajtur një profil sigurie të menaxhueshëm”.
Megjithatë, ai theksoi se studimet për grupmoshën 6–12 vjeç janë ende në zhvillim dhe se miratimi për përdorim tek fëmijët më të vegjël do të varet nga rezultatet përfundimtare dhe nga vlerësimi i raportit përfitim-rrezik nga autoritetet rregullatore.
Që nga viti 2021, më shumë se 6 mijë fëmijë janë trajtuar në klinikat e specializuara të obezitetit në Britani, ku një pjesë e pacientëve mbi 12 vjeç kanë marrë barna për humbjen e peshës.
Studime të tjera të prezantuara më herët këtë vit kanë treguar se këto barna jo vetëm ndihmojnë në humbjen e peshës, por ulin ndjeshëm mungesat në punë për arsye shëndetësore dhe mund të reduktojnë presionin mbi sistemin shëndetësor.
Ekspertët vlerësojnë se zgjerimi i përdorimit të tyre mund të shmangë miliona vizita te mjeku i familjes dhe të ulë ndjeshëm shtrimet në urgjencë të pacientëve me obezitet.
Aktualisht, rreth dy në tre të rritur në Britaninë e Madhe janë mbipeshë ose obezë, ndërsa mbi dy milionë persona përdorin barna GLP-1 për humbjen e peshës, kryesisht të blera në mënyrë private. Në javët e fundit kanë dalë në treg edhe tabletat për dobësim që veprojnë në të njëjtin mekanizëm si injeksionet, dhe pritet që përdorimi i tyre të rritet me shpejtësi.
