Kryetari i Partisë Demokratike, Sali Berisha, ka kundërshtuar paketën e re fiskale të paralajmëruar nga qeveria, duke akuzuar kryeministrin Edi Rama se po rëndon barrën tatimore mbi bizneset shqiptare. Sipas tij, rritja e taksave rrezikon të çojë drejt falimentimit mijëra sipërmarrje dhe të shkaktojë humbje të vendeve të punës.
Përmes një videomesazhi në rrjetet sociale, Berisha deklaroi se ndryshimet janë paralajmëruar pa konsultime me grupet e interesit. Ai pretendon se paketa parashikon rritjen e tatimit mbi dividentin nga 8% në 15%, të tatimfitimit nga 15% në 17%, si dhe uljen e pragut të regjistrimit për TVSH nga 10 milionë në 5 milionë lekë xhiro vjetore.
Sipas kryedemokratit, këto masa do të rrisin kostot e bizneseve dhe do të ndikojnë drejtpërdrejt edhe te qytetarët, përmes shtrenjtimit të produkteve dhe shërbimeve. Berisha paralajmëroi se pasojat mund të jenë veçanërisht të rënda për bizneset e vogla dhe të mesme.
Kreu i opozitës e lidhi këtë situatë edhe me ecurinë e ekonomisë shqiptare, duke pretenduar se zhvlerësimi i euros dhe dollarit me 35% ka dëmtuar eksportuesit. Ai deklaroi gjithashtu se prodhimi industrial ka rënë me 15.3%, ndërsa eksportet me 28%, pa specifikuar periudhën së cilës u referohen këto shifra.
Berisha akuzoi qeverinë edhe për keqadministrimin e financave publike, duke pretenduar se të ardhurat nga taksat përdoren në favor të interesave të lidhura me pushtetin.
