Komisioneri për të Drejtat e Njeriut i Këshillit të Evropës, Michael O’Flaherty, u ka bërë thirrje shteteve anëtare të garantojnë të drejtën e qytetarëve për tubime paqësore dhe të sigurojnë që ndërhyrjet e policisë gjatë protestave të jenë në përputhje me standardet ndërkombëtare të të drejtave të njeriut.
Në një deklaratë të publikuar në kuadër të protestave që po zhvillohen në vende të ndryshme të Evropës, ku pjesëmarrje të konsiderueshme kanë të rinjtë dhe studentët, O’Flaherty theksoi rëndësinë e mbrojtjes së lirisë së tubimit, veçanërisht përpara demonstratave të tjera të paralajmëruara.
Komisioneri nënvizoi se aktet e dhunës të kryera nga individë apo grupe të caktuara nuk mund të shërbejnë si justifikim për kufizime arbitrare, ndalime të përgjithshme apo shpërndarjen e një proteste të tërë. Sipas tij, autoritetet duhet të bëjnë dallimin ndërmjet personave që përfshihen në akte dhune dhe qytetarëve që ushtrojnë në mënyrë paqësore të drejtën e tyre për të protestuar.
O’Flaherty kërkoi që forcat e rendit t’i japin përparësi dialogut dhe uljes së tensioneve, duke theksuar se ndërhyrjet për të parandaluar plaçkitjet, trazirat dhe për të garantuar sigurinë publike duhet të respektojnë kufijtë ligjorë.
Në këtë drejtim, ai përcaktoi disa standarde që duhet të zbatohen gjatë menaxhimit të protestave. Përdorimi i forcës nga policia duhet të jetë i domosdoshëm dhe proporcional, ndërsa çdo pretendim për përdorim të tepruar të saj duhet të hetohet pa vonesa.
Gjithashtu, Komisioneri theksoi se ndalimi ose privimi nga liria i protestuesve duhet të ketë bazë të qartë ligjore dhe nuk mund të përdoret si mjet frikësimi apo për të penguar pjesëmarrjen në tubime paqësore.
Vëmendje e veçantë, sipas tij, duhet t’i kushtohet mbrojtjes së fëmijëve dhe të miturve. Ndërhyrjet policore duhet të marrin parasysh moshën dhe cenueshmërinë e tyre, ndërsa ndalimi duhet të përdoret vetëm si masë e fundit, duke garantuar aksesin në ndihmë juridike.
O’Flaherty ngriti gjithashtu shqetësimin se përfshirja e personelit ushtarak në kontrollin e demonstratave mund të krijojë probleme nga këndvështrimi i respektimit të të drejtave të njeriut.
Në përfundim, Komisioneri për të Drejtat e Njeriut i Këshillit të Evropës theksoi se mbrojtja e tubimeve paqësore përbën një detyrim demokratik për shtetet, ndërsa çdo reagim i autoriteteve ndaj protestave duhet të udhëhiqet nga respektimi i të drejtave të njeriut dhe shtetit të së drejtës.
