Kreu i grupit parlamentar të Partisë Socialiste, Taulant Balla, ka zgjedhur protestat studentore në Serbi për t'u dhënë këshilla studentëve shqiptarë që protestojnë kundër qeverisë së Edi Ramës. Por në vend që të ndalet te kërkesat e tyre dhe përgjegjësia e qeverisë për t'u dhënë përgjigje, socialisti u ka sugjeruar të ndjekin shembullin e protestuesve serbë.
“Meqë nuk ma bëni pyetjen, ju sugjeroj studentëve të marrin shembullin e studentëve në Serbi”, deklaroi Balla pas mbledhjes së grupit parlamentar socialist.
Ai kujtoi se protestat në vendin fqinj zgjatën tre vite dhe se ndryshimi politik u konkretizua përmes votës.
“Kishte një protestë zgjati 3 vite me radhë në fund u konkretizua me votë”, u shpreh Balla, duke theksuar se “në demokraci harrojeni se mund të ketë ndryshim pushteti pa votë”.
Ironia qëndron te fakti se Balla e përdor shembullin e Serbisë për t'u treguar studentëve sa gjatë mund të protestojnë, por jo për të reflektuar mbi mesazhin që protestat i japin vetë pushtetit. Në vend që të shpjegojë se çfarë duhet të ndryshojë qeveria përballë pakënaqësisë studentore, pasi mund të pësojnë të njëjtin fat si në Serbi, ai këshillon studentët se çfarë duhet të bëjnë.
Kështu, mbetet pyetja nëse edhe mazhoranca shqiptare duhet të nxjerrë një mësim nga zhvillimet në Beograd. Sepse protestat studentore nuk janë vetëm një provë durimi për ata që dalin në rrugë, por edhe një provë përgjegjësie për ata që janë në pushtet.
