Gjykata e Posaçme kundër Korrupsionit dhe Krimit të Organizuar ka refuzuar kërkesat e ish-presidentit Ilir Meta për të qëndruar jashtë kafazit të xhamit gjatë procesit gjyqësor, si dhe për transmetimin drejtpërdrejt të seancave për publikun.
Kreu i Partisë së Lirisë ka kërkuar në mënyrë të përsëritur që të qëndrojë pranë avokatit të tij gjatë shqyrtimit të çështjes, duke kundërshtuar vendosjen në hapësirën e izoluar me xham brenda sallës së gjyqit.
Një tjetër kërkesë e Metës ka qenë lejimi i kamerave dhe transmetimi i drejtpërdrejtë i procesit gjyqësor, me argumentin se publiku duhet të ketë mundësi të ndjekë zhvillimet dhe të njihet me pretendimet e palëve.
Gjykata e Posaçme ka mbajtur qëndrim refuzues ndaj këtyre kërkesave, duke argumentuar se prania e kamerave mund të ndikojë në zhvillimin normal të procesit gjyqësor. Ndërkohë, në një vendim të mëparshëm, trupa gjykuese ka pranuar kërkesën që mbrojtjes t'i krijohen kushtet për aksesimin e provave elektronike.
Procesi gjyqësor ndaj Ilir Metës dhe ish-bashkëshortes së tij, Monika Kryemadhi, lidhet me hetimet për çështjen CEZ-DIA, lobimin e LSI-së në Shtetet e Bashkuara të Amerikës dhe pasuritë e të pandehurve.
Meta përballet me akuza për korrupsion, pastrim parash dhe fshehje pasurie, të cilat i ka kundërshtuar. Ish-presidenti ndodhet në paraburgim që prej tetorit të vitit 2024, ndërsa procesi ndaj tij vijon në Gjykatën e Posaçme.
