Real Madridi ka njoftuar këtë të martë ndërprerjen e bashkëpunimit me Alvaro Arbeloan si trajner i ekipit të parë, pak përpara zyrtarizimit të Jose Mourinhos në stolin e madrilenëve.
Arbeloa largohet pas 28 ndeshjesh në krye të skuadrës, duke regjistruar 18 fitore, 2 barazime dhe 8 humbje. Nën drejtimin e tij, Reali u eliminua si nga Kupa e Mbretit ashtu edhe nga Liga e Kampionëve, ndërsa nuk arriti të rivalizonte për titullin në La Liga.
Në një deklaratë zyrtare, klubi madrilen falënderoi ish-trajnerin për kontributin e dhënë.
“Real Madrid i shpreh mirënjohjen e thellë Alvaro Arbeloas, i cili gjatë gjithë kohës së tij në klub, që nga ardhja në akademi, ka treguar gjithmonë besnikëri, përkushtim dhe profesionalizëm. Ai është një shembull i vlerave të klubit tonë. Real Madrid, i cili do të jetë gjithmonë shtëpia e tij, i uron Alvaro Arbeloas dhe gjithë familjes së tij më të mirat në këtë etapë të re të jetës së tyre”, thuhet në reagimin e klubit.
Ndërkohë, “Los Blancos” vijojnë të jenë aktivë edhe në merkato. Më herët gjatë ditës, klubi bëri të ditur se ka paraqitur një ofertë prej 150 milionë eurosh për sulmuesin e Atletico Madridit, Julian Alvarez, në përpjekje për të siguruar shërbimet e argjentinasit për sezonin e ardhshëm.
