Për herë të parë që nga nisja e protestave që prej dy javësh po mbajnë të ndezur debatin publik në vend, kreu i Partisë Demokratike, Sali Berisha, pranoi se nuk do t’i bashkohet protestës që ka hyrë në ditën e saj të 14-të.
Gjatë një bashkëbisedimi me ndjekësit në Facebook, Berisha deklaroi se nuk do të jetë i pranishëm për sa kohë, sipas tij, prezenca e tij mund të dëmtojë “fibrën qytetare” të protestës. Një fjali që, pavarësisht nëse ishte lapsus apo një formulim i menduar, përmban një të vërtetë të hidhur për opozitën e drejtuar prej tij.
Në thelb, Berisha pranoi se prania e tij nuk shihet si vlerë e shtuar për protestën, por si element që mund të largojë një pjesë të qytetarëve. Protestat e ditëve të fundit janë karakterizuar nga sloganet “Rama në burg, Berisha në burg” dhe nga një refuzim i hapur i klasës tradicionale politike, duke përfshirë jo vetëm qeverinë, por edhe opozitën.
Pikërisht ky është problemi më i madh me të cilin përballet sot Partia Demokratike. Pas disa vitesh të dominuara nga rikthimi i Berishës në krye të partisë, nga përplasjet e brendshme dhe nga procese që kritikët i kanë cilësuar si formale apo të kontrolluara, PD nuk ka arritur të bindë se përfaqëson një alternativë të re politike. Për shumë qytetarë, ajo vazhdon të identifikohet me të njëjtat figura dhe të njëjtin model drejtimi që kanë dominuar jetën politike shqiptare për dekada.
Ndërkohë, i pyetur për zhvillimet e brendshme në PD, në një kohë kur ende nuk ka nisur procesi i zgjedhjes së strukturave pas konstituimit të Këshillit të ri Kombëtar, Berisha u shpreh se vonesat lidhen me çështje teknike.
Megjithatë, përtej justifikimeve organizative, deklarata e sotme mund të mbetet si një nga pranimit më domethënës politik të tij: se protesta më e madhe qytetare e muajve të fundit nuk e sheh më Sali Berishën si pjesë të zgjidhjes, por si pjesë të problemit që kërkon të ndryshojë.
