Kryetari i Partisë Demokratike, Sali Berisha, ka dalë sot në mbështetje të protestës qytetare që prej ditësh po zhvillohet në Tiranë kundër qeverisë së Edi Ramës, duke u bërë thirrje demokratëve që t’i bashkohen asaj. Megjithatë, ndryshe nga mbështetësit e tij, vetë Berisha nuk pritet të marrë pjesë në protestë.
Në një konferencë për mediat nga selia blu, kreu i PD-së e cilësoi protestën si një “uragan të fuqishëm” kundër qeverisë dhe tha se ajo tashmë ka tejkaluar kufijtë e forcave politike. Ai u kërkoi demokratëve dhe simpatizantëve të opozitës të bashkohen me protestuesit në rrugët e Tiranës.
“Thirrja ime për çdo demokrat dhe mbështetës të PD është të bashkohen në protestën e rinisë dhe qytetarëve të Tiranës”, deklaroi Berisha.
Deklarata vjen në një moment kur organizatorët dhe pjesëmarrësit e protestës kanë këmbëngulur vazhdimisht se lëvizja nuk i përket asnjë partie politike dhe nuk dëshiron të identifikohet me figurat tradicionale të politikës shqiptare. Pikërisht për këtë arsye, Berisha ka zgjedhur të qëndrojë në distancë nga protesta, duke ofruar mbështetje politike nga jashtë dhe duke ftuar demokratët të marrin pjesë si qytetarë.
Gjatë konferencës, Berisha sulmoi ashpër kryeministrin Edi Rama për qëndrimin ndaj protestuesve, duke e akuzuar se po përpiqet të minimizojë dhe sfumojë revoltën qytetare. Ai kritikoi gjithashtu aktivitetin e organizuar nga Partia Socialiste për përvjetorin e saj, të cilin e cilësoi një “antimiting” të ngritur për t’iu kundërvënë protestës.
Kreu i opozitës u bëri thirrje edhe socialistëve të mos marrin pjesë në aktivitetet e organizuara nga Partia Socialiste dhe kërkoi dorëheqjen e kryeministrit Rama, duke argumentuar se qeveria nuk po dëgjon kërkesat e qytetarëve që kanë dalë në rrugë.
