Interpelanca e kërkuar nga kreu i Partisë Mundësia, Agron Shehaj, për faljen e gjobës ndaj Bankers Petroleum mori një kthesë të papritur në Kuvend. Në vend që debati të përqendrohej te kompania e naftës, ministri i Financave, Petrit Malaj, vendosi të hapte dosjen e kompanive të vetë interpeluesit.
Me një fletë A4 në dorë, ministri deklaroi se kishte një listë me 17 kompani të lidhura me Shehajn, shumica jashtë Shqipërisë, duke e ftuar atë të shpjegonte se si i nxirrte jashtë vendit fitimet e krijuara në Shqipëri. “Je marrë ti me ne, do merrem dhe unë me ty”, ishte mesazhi politik që shoqëroi prezantimin e dokumentit.
Shehaj nuk u duk i impresionuar nga “zbulimi”, duke kujtuar se kompania IDS është e deklaruar publikisht prej vitesh dhe figuron në deklaratat e pasurisë. “Po na bën sikur ke zbuluar diçka”, iu përgjigj ai ministrit.
Debati u ndez edhe më shumë teksa Malaj vazhdonte të valëviste fletën A4, e cila për disa minuta u kthye në protagonisten kryesore të seancës. Nga Bankers Petroleum, diskutimi kaloi te IDS, te kompanitë e Shehajt dhe më pas te stafi i Ministrisë së Financave.
Në kulmin e përplasjes, Shehaj akuzoi ministrin për kërcënim politik dhe e quajti “maskara”, gjë që mjaftoi që nënkryetarja socialiste e Kuvendit të ndërhynte me masën më të zakonshme të parlamentarizmit shqiptar: përjashtimin nga salla.
Kështu, interpelanca për faljen e gjobës së Bankers Petroleum përfundoi me një debat për kompanitë e Agron Shehajt dhe me largimin e këtij të fundit nga Kuvendi, ndërsa pyetjet për Bankers mbetën diku mes fletës A4 dhe zhurmës së sallës.
