Kryetari i Partisë Demokratike, Sali Berisha, njoftoi këtë të enjte se Shtetet e Bashkuara të Amerikës kanë vendosur t’i heqin statusin “non grata”, i vendosur ndaj tij në maj të vitit 2021 nga administrata amerikane.
Lajmi u konfirmua nga vetë Berisha në momentin kur mbërriti në seancën plenare të Kuvendit, ku u prit me duartrokitje nga deputetët e opozitës. Edhe pse nuk iu përgjigj pyetjeve të gazetarëve, ai dha një koment të shkurtër nga foltorja.
“Unë erdha, u krye”, tha Berisha.
Njoftimi ka shkaktuar entuziazëm në radhët e opozitës, por deri më tani mungon çdo konfirmim zyrtar nga institucionet amerikane. As Ambasada e SHBA-së në Tiranë dhe as Departamenti Amerikan i Shtetit nuk kanë publikuar ndonjë deklaratë lidhur me një vendim të tillë.
Madje, në faqen zyrtare të Departamentit të Shtetit, në seksionin ku publikohen personat e sanksionuar sipas nenit 7031(c), emri i Sali Berishës vazhdon të figurojë në listën e publikuar për vitin fiskal 2021, së bashku me bashkëshorten e tij Liri Berisha dhe djalin Shkëlzen Berisha.
Kjo ka ngritur pikëpyetje mbi natyrën e vendimit të pretenduar nga Berisha. Deri në këtë moment nuk është e qartë nëse bëhet fjalë për heqjen formale të sanksionit apo për një lehtësi administrative që mund t’i mundësojë ish-kryeministrit të udhëtojë drejt Shteteve të Bashkuara.
Burime pranë Partisë Demokratike pretendojnë se Berisha është njoftuar për vendimin nga përfaqësues të administratës amerikane dhe ai pritet të udhëtojë drejt SHBA-s. Por pa u bërë publik asnjë dokument zyrtar, mbetet e paqartë se çfarë ka ndryshuar konkretisht në statusin e tij juridik ndaj autoriteteve amerikane.
Për momentin, i vetmi fakt i verifikueshëm publikisht është se emri i Berishës vijon të jetë i pranishëm në listën e publikuar nga Departamenti i Shtetit, ndërsa pritet një reagim zyrtar nga institucionet amerikane për të sqaruar nëse sanksioni është hequr, pezulluar apo nëse bëhet fjalë për një zhvillim tjetër procedural.
