Aktivistja Edlira Çepani ka reaguar pasi emri i saj u përmend gjatë ditës si pjesë e grupit organizator të protestës. Në deklaratat e saj, Çepani nuk e mohoi përfshirjen në grupin organizator, por theksoi se organizatorët e vërtetë të protestës janë të rinjtë dhe vetë qytetarët që prej ditësh po mbushin sheshet.
Sipas saj, emri i saj lidhet me angazhimin e kahershëm për reformën zgjedhore, listat e hapura dhe mundësinë që qytetarët të garojnë në zgjedhje përmes listave qytetare, pa qenë të detyruar të krijojnë ose t’i bashkohen partive politike.
Çepani kujtoi se prej vitit 2008 ka kundërshtuar sistemin aktual zgjedhor, i cili sipas saj ka prodhuar liderë të fortë dhe institucione të dobëta. Ajo tha se një nga kërkesat kryesore është krijimi i mundësisë që grupime qytetarësh të garojnë në zgjedhje me lista qytetare, në kushte të barabarta me partitë politike, si dhe hapja e plotë e listave.
Aktivistja e cilësoi protestën si një nga mobilizimet më të mëdha qytetare që ka parë Shqipëria në vitet e fundit.
“Është një nga protestat më të mëdha që ka parë ndonjëherë Shqipëria dhe për ne si aktivistë është një nga eksperiencat më të bukura që kemi dashur të shohim në vend”, u shpreh ajo.
Sipas Çepanit, për shumë vite reagimi qytetar është monopolizuar nga partitë politike, duke krijuar përshtypjen se protestat mund të organizohen vetëm prej tyre. Ajo argumentoi se lëvizja aktuale e ka thyer këtë model dhe ka treguar se qytetarët mund të bashkohen dhe të organizohen edhe jashtë strukturave tradicionale politike.
“Qytetarët tashmë janë vetëdijësuar se zëri i tyre dëgjohet më fort kur janë bashkë. Kjo është një nga arritjet më të mëdha të kësaj proteste”, deklaroi ajo.
Çepani tha se ajo që sheh në shesh është një ndjenjë dinjiteti qytetar dhe atdhetar që kapërcen ndasitë politike, moshën apo prejardhjen e pjesëmarrësve, duke e konsideruar këtë si një nga elementët më të rëndësishëm të mobilizimit të deritanishëm.
