Teksa mijëra qytetarë protestojnë prej 11 ditësh në rrugët e Tiranës, kryetari i FRPD-së, Besart Xhaferri, duket se ka zgjedhur rolin e analistit të protestës dhe jo të organizatorit të saj. Në një intervistë televizive, deputeti demokrat renditi katër kushtet që sipas tij do ta bënin protestën të suksesshme: ndryshime kushtetuese, kufizimin e mandateve, qeverinë teknike dhe një Kod të ri Zgjedhor.
Në teori, shumë prej këtyre propozimeve mund të jenë të diskutueshme ose të vlefshme. Por pyetja që lind është më e thjeshtë: ku ishte FRPD-ja në organizimin e kësaj vale protestash? Në vend që të shpjegojë se çfarë duhet të arrijë protesta, ndoshta drejtuesi i të rinjve demokratë duhet të shpjegojë pse organizata që drejton nuk ka qenë në gjendje të udhëheqë një mobilizim të tillë kundër qeverisë gjatë viteve të fundit.
Ironia është se shumë nga temat që sot artikulohen në shesh – kundër oligarkisë, kundër investitorëve strategjikë, kundër kapjes së shtetit dhe për një Shqipëri më demokratike – janë kauza që një forum rinor opozitar duhej t’i kishte ngritur prej kohësh. Në vend të kësaj, revolta po zhvillohet kryesisht jashtë strukturave tradicionale politike.
Ndoshta, përpara se t’u japë protestuesve recetën e suksesit, Besart Xhaferri duhet të marrë disa leksione nga vetë qytetarët që prej ditësh janë në rrugë pa logot e partive, por me një gjë që partitë duket se e kanë humbur: aftësinë për të mobilizuar njerëzit.
