I ngritur legjislaturën e shkuar me shumë bujë nga Kuvendi dhe i pompuar nga Edi Rama si një komision i posaçëm i domosdoshëm për kohën, Komisioni i Deziformimit që u drejtua nga Erjon Braçe, u hodh poshtë dhe tashmë është kthyer në një xhep të parëndësishëm në Kuvend.
Ndryshe nga Fatmir Xhafaj i cili ja doli të luftojë me çdo mjet e ta ruajë komisionin e tij, Braçe nuk mbijetoi.
Tashmë, në mesin e hamendësimeve dhe justifikimeve të qeverisë për luftë hibride, dezinformim dhe manipulim, socialistët nuk e kanë më këtë mjet parlamentar në qendër të vëmendjes.
Jo vetëm që komisioni nuk do të ekzistojë, as përkohësisht, por sot ju vendos vula në Komisionin e të Drejtave të Njeriut, duke e kthyer vetëm në një Nënkomision për Dizinformimin.
Ai do të drejtohet nga socialistja Luarasi, me pjesëmarrje edhe nga opozita.
"...do të drejtohet nga mazhoranca, nga zëvendëskryetarja e komisionit zonja Iris Luarasi. Do të ketë për detyrë që të shohim se si po zbatohet strategjia kombëtare e dezinformimi, por njëkohësisht edhe elementë që lidhen me kuadrin ligjor në kushtet e sigurisë informative. Anëtarët do të jenë zonja Luarasi, zoti Bido, zoti Mazniku, zoti Gjekmarkaj dhe zonja Bardeli. Unë ju siguroj që përfaqësuesit e opozitës në këtë nën komision kanë së pari detyrë që ne të mos abuzojmë me vijën e kuqe që ekziston për lirinë e medias dhe të drejtën e informimit,"-tha Kryetarja Tabaku.
Komisioni kundër Dezinformimit i drejtuar nga Braçe u kritikua që në nisje të punës, me dyshime serioze se qeveria do ta përdorte si kamxhik kundër fjalës së lirë.
