Deputetja e Partisë Socialiste, Ilva Gjuzi, ka komentuar protestat që prej 11 ditësh po zhvillohen në Tiranë dhe në Zvërnec, duke deklaruar se ato kanë humbur fokusin fillestar dhe nuk po artikulojnë më një narrativë të qartë.
Sipas saj, protestat nisën si reagim ndaj projektit të investimit në Zvërnec, por më pas u shndërruan në një lëvizje me kërkesa të ndryshme politike, çka sipas saj ka krijuar paqartësi mbi qëllimet e tyre.
“Është një grup aspak homogjen, është një grup shumë i përzier, por ne jemi për t’i dëgjuar. Protesta është një mjet legjitim demokratik, por përgjegjësia jonë është të dëgjojmë dhe të krijojmë hapësirë për dialog”, u shpreh deputetja socialiste.
Gjuzi tha se fillimisht i kishte ndjekur protestat me interes për shkak të debatit mbi zhvillimin e zonës së Zvërnecit, por shtoi se me kalimin e ditëve ato kanë ndryshuar drejtim.
“Nuk po artikulohet një narrativë shumë e qartë. Mendoj se fokusi fillestar ka qenë zhvillimi i atij investimi në zonën e Zvërnecit, ndërsa më pas janë shtuar tema të tjera”, tha ajo.
Deputetja socialiste ngriti edhe shqetësimin për ndikimin që protestat mund të kenë mbi sektorin e turizmit, duke argumentuar se zhvillimi i tyre në kulmin e sezonit veror nuk është momenti më i përshtatshëm për ekonominë e vendit.
Sipas saj, debati për investimin duhet të vazhdojë, por mbi bazën e fakteve dhe propozimeve konkrete për përmirësimin e projektit.
E pyetur nëse ekziston një udhëzim nga qeveria për të sulmuar influencerët apo figurat publike që mbështesin protestat, Gjuzi e mohoi një gjë të tillë.
“Nëse ka, të ma tregojnë dhe mua, se deri tani nuk e kam dëgjuar”, deklaroi deputetja socialiste.
