Kreu i Lëvizjes Bashkë, Arlind Qori, mori pjesë edhe sot në protestën e zhvilluar në Tiranë, i shoqëruar nga djali i tij. Në një prononcim televiziv, ai deklaroi se në momente të tilla politikanët duhet të flasin më pak dhe të dëgjojnë më shumë qytetarët.
“Detyra e politikanëve është të përfaqësojnë popullin kur populli merret me punët e veta të përditshme. Tashmë populli është në rrugë, e ka marrë sovranitetin aktiv. Kështu që unë jam thjesht një grimcë në oqeanin e madh të shoqërisë shqiptare që po proteston”, u shpreh Qori.
Deklarata vjen megjithëse vetë kreu i Lëvizjes Bashkë ka qenë një nga politikanët që ka folur më shpesh për protestën, duke marrë pjesë pothuajse çdo ditë në tubime dhe duke komentuar zhvillimet e saj në media dhe rrjete sociale.
Qori kujtoi se Lëvizja Bashkë ka qenë pranë banorëve të Zvërnecit që në fillim të kundërshtimit të projektit dhe tha se protesta tashmë ka tejkaluar kufijtë e kësaj kauze.
Sipas tij, në shesh është bashkuar pakënaqësia e qytetarëve ndaj shumë problemeve, nga shpronësimet dhe dëmtimi i mjedisit deri te korrupsioni dhe kriza e përfaqësimit politik.
“Zvërneci nuk është më një kauzë e vetme, por është pasuar nga kauza të tjera jetësore për qytetarët shqiptarë. Në shesh ka zbritur i gjithë mllefi i shoqërisë shqiptare për padrejtësitë që pësojmë dhe thelbi i kësaj pakënaqësie është emri i Edi Ramës si kryeministër dhe emrat e Ramës dhe Berishës si përfaqësues të një sistemi të vjetër politik”, tha ai.
I pyetur për praninë e djalit të tij në protestë, Qori u shpreh se tubimi është një hapësirë qytetare ku marrin pjesë njerëz të të gjitha moshave, duke theksuar se në protestë ka pasur fëmijë, të rinj dhe të moshuar.
