Protestat që po zhvillohen në Tiranë dhe në qytete të tjera u bënë pjesë e debatit në seancën plenare të së enjtes, ku nuk munguan akuzat dhe ironitë mes mazhorancës dhe opozitës.
Deputetja e Partisë Demokratike, Ina Zhupa, deklaroi nga foltorja e Kuvendit se qytetarët po kërkojnë largimin e kryeministrit dhe ngritjen e një qeverie tranzitore.
“Ky Kuvend nuk mund të jetë i ndarë nga realiteti i qytetarëve në shesh. Keni lënë pa datë projektligjin për shfuqizimin e zonave të mbrojtura, një nga kërkesat e protestuesve. Realiteti kërkon dorëheqjen e Edi Ramës dhe një qeveri tranzitore”, u shpreh Zhupa.
Ajo reagoi gjithashtu për protestat që po mbahen në Tiranë dhe në diasporë, duke u bërë thirrje deputetëve të dëgjojnë zërin e qytetarëve.
“Ky ishte fiks një fjalim flamingo nga Temu. Ju zogjtë e bufit ju duket vetja si flamingo. Bëni zhurmë sa të doni, shkoni edhe në protestë po deshët”, tha Balla.
Ai theksoi se mazhoranca do të rrëzojë katër projektligjet e propozuara nga opozita dhe mbrojti projektin e investimit në Zvërnec, duke deklaruar se “Shqipëria nuk e ka luksin të humbë 4 miliardë” dhe se projekti do të vijojë.
Balla përplasjet i vijoi me deputetin Shehaj.
Nga foltorja e Kuvendit, Shehaj deklaroi se protestat e zhvilluara së fundmi tregojnë se qytetarët nuk e duan më qeverinë, duke kërkuar shpërndarjen e Parlamentit. Ai akuzoi mazhorancën për tallje me protestuesit dhe përdori tone të ashpra ndaj Ballës.
“Ky parlament duhet të shkrihet sa më shpejt, nuk ju duan më njerëzit”, u shpreh Shehaj, ndërsa iu drejtua Ballës me fjalët: “Ki kujdes mos kalo afër koshit të plehrave”.
Balla iu përgjigj menjëherë, duke e akuzuar Shehajn për vjedhje të të dhënave personale dhe duke deklaruar se ai është i dënuar dhe nën hetim. Socialisti tha se Shehaj nuk është i shqetësuar për protestat, por për çështje pronësie që lidhen me familjarët e tij.
“Ti je një hajdut. Je hajdut të dhënash personale, je i dënuar, je nën hetim”, deklaroi Balla nga salla e Kuvendit.
Nga ana e tij, Shehaj hodhi poshtë akuzat, duke sqaruar se familja e tij jeton jashtë Shqipërisë prej vitit 1991 dhe se nuk ka përfituar prona.
“Familja ime jeton jashtë prej ’91. Ne nuk kemi marrë asnjë metër katror nga çfarë na takonte, por je një shpifës ordiner”, iu përgjigj ai Ballës.
